မန္တလေးတိုင်း မတ္တရာမြို့နယ် ရုန်းပင်ကျေးရွာရှိ အာဏာသိမ်းစစ်ကောင်စီ၏ ရဲကင်းစခန်း တစ်ခုမီးရှို့ခံရပြီးနောက် ဒေသတွင်းသို့ စစ်ကောင်စီတပ်များဝင်ရောက်စီးနင်းပြီး အနီးဝန်းကျင်ရှိ ကျေးရွာ ၃ရွာမှ ဒေသခံ ၂၀ခန့်ကို ဖမ်းဆီးခေါ်ဆောင်သွားသည်ဟု မတ္တရာဒေသခံက ပြောသည်။
ဒီဇင်ဘာ ၁၉ရက်နံနက် အစောပိုင်းက ရုန်းပင်ရဲစခန်း မီးလောင်ပြီးနောက် စစ်ကောင်စီတပ်က ဒေသတွင်းသို့ အင်အားအများအပြားဖြင့် ဝင်ရောက်ကာ ဒေသခံများကို ဖမ်းဆီးခြင်းဖြစ်သည်ဟုဆိုသည်။ စစ်ကောင်စီတပ်သည် သဖန်းကိုင်းနှင့် မဟာမြိုင်ရွာ၌ တပ်စွဲပြီး အနီးဝန်းကျင်သို့ရှာဖွေမှုများလုပ်ဆောင်ခဲ့သည်ဟု ဒေသခံက ပြောသည်။
“သဖန်းကိုင်းကွင်းခေါ်တာပေါ့ စပါးကျီတောင်၊ ပန်းသလဲတောင် အဲဒီ တောင်ခြေတစ်၀ိုက်က သရက်ခြံတွေ၊ နှမ်းခင်းတွေ ပြောင်းခင်းတွေ နွားစားကျက်တွေအဲဒီက တဲတွေကို မွှေနှောက်ပြီး လူဖမ်းတယ်။သူတို့ ဖမ်းတာ ပထမတုန်းက အယောက် ၃၀ကျော်လောက်ရှိတယ် ။ ဒီနေ့ နေ့လည် တစ်နာရီ ဝန်းကျင်မှာ အယောက် ၂၀ ဝန်းကျင်ကို မတ္တရာကို ခေါ်သွားတယ်”ဟု ၎င်းက ဆိုသည်။
ဖမ်းဆီးသွားသူများကို ပြန်လွှတ်ပေးမည်ဟု ကြားရသော်လည်း စောင့်ကြည့်ရမည်ဖြစ်ကြောင်း၊ စစ်ကောင်စီတပ်က ရှာဖွေမှုများ ဆက်လုပ်နေကြောင်း ဒေသခံက ပြောသည်။
Public Service Announcement
