ဇူလိုင်-၇၊၂၀၂၆။မိုမို/People’s Spring
ကရင်နီပြည်နယ်၊ဒီးမော့ဆို နဲ့ ဖရူဆိုမြို့နယ်အစပ်က စစ်တပ်ကာကင်းစခန်းကို ကရင်နီပူးပေါင်းတပ်က တိုက်ခိုက်ခဲ့ပြီး ထိခိုက်သေဆုံးသူများတယ်လို့ ဒေသခံစစ်ရေးသတင်းရင်းမြစ်တချို့ကလူထုနွေဦးကို ပြောပါတယ်။
“ဒီးမော့ဆို နဲ့ ဖရူဆိုမြို့နယ်အစပ် ငွေတောင်ရွာသစ် မှာ တိုက်ပွဲ ဖြစ်ခဲ့တာ”လို့ ကရင်နီပူးပေါင်းတပ်တာ၀န်ရှိသူကပြောပါတယ်။
ဇူလိုင် ၆ ရက်က ဒီးမော့ဆိုမြို့နယ်နဲ့ ဖရူဆိုမြို့နယ်အစပ်မှာ တိုက်ပွဲဖြစ်ခဲ့တာဖြစ်ပြီး စစ်တပ်ကာကင်စခန်းကို ကရင်နီပူးပေါင်းတပ်က ၀င်တိုက်ခိုက်ခဲ့တာလို့ ဆိုပါတယ်။
Public Service Announcement
” မနေ့ကမနက် ထိတွေ့မှုဖြစ်တယ်။စကစ ကာကင်းတစ်ခုနားမှာ။စကစဘက်က ထိခိုက်သေဆုံးမှုများတယ်”လို့ ကရင်နီအခြေစိုက် စစ်ရေးသတင်းရင်းမြစ်က ပြောပါတယ်။
တိုက်ပွဲအတွင်း ကရင်နီပူးပေါင်းတပ်က ရဲဘော်တစ်ဦး ကျဆုံးခဲ့တယ်လို့လည်း သူက အသိပေးပါတယ်။
စစ်တပ်ကဒီးမော့ဆိုမြို့ကို ပြန်လည်ထိန်းချုပ်နိုင်ပြီနောက်ဖရူဆိုမြို့နယ်အစပ်မှာရှိတဲ့ ကွိုင်ငံရွာသစ်၊ကွိုင်ငံရွာဟောင်းနဲ့ ငံရိုးကျေးရွာတွေကို၂၀၂၅ စက်တင်ဘာလနောက်ပိုင်း ၀င်ရောက်စစ်ရေးလှုပ်ရှားမှုတွေရှိခဲ့တာလို့ ဒေသခံအချို့ကပြောပါတယ်။
ကရင်နီဒေသတွင်း စစ်ရေးအရအရေးပါတဲ့ လွိုင်ကော်-ဒီးမော့ဆို-ဖရူဆို လမ်းမကြီး စိုးမိုးရေးနဲ့ ပိတ်မိနေတဲ့ ဖရူဆိုမြို့စောင့်တပ်တွေ စစ်ရေးလှုပ်ရှားနိုင်ဖို့ စစ်တပ်က ကြိုးပမ်းနေရဆဲ ဖြစ်ပါတယ်။
ဖရူဆိုမြို့နယ်မှာ စစ်တပ်ရဲ့ အမှတ် (၁၄) တန်းမြင့်စစ်ရေးလေ့ကျင့်ရေးကျောင်း၊ အမှတ်(၅၃၁) ခြေမြန်တပ်ရင်း (ခမရ−၅၃၁) နဲ့ (ခမရ−၄၂၈) တပ်ရင်းတွေရှိပါတယ်။
