ဇူလိုင် ၁၁၊ ၂၀၂၆။ဟာနာဆန်/People’s Spring
မန္တလေးတိုင်း၊ ညောင်ဦးမြို့နယ်က အမျိုးသားဒီမိုကရေစီအဖွဲ့ချုပ်ပါတီ NLD ရုံးကို အာဏာသိမ်းစစ်တပ်က ဝင်ရောက်စီးနင်းဖျက်ဆီးသွားကြောင်း ဒေသခံတွေက ပြောပါတယ်။
ဇူလိုင် ၉ ရက်ညက အမျိုးသားဒီမိုကရေစီအဖွဲ့ချုပ်ရဲ့ညောင်ဦးမြို့နယ်ရုံးအတွင်းရှိ ဗိုလ်ချုပ်အောင်ဆန်းရုပ်ပုံတွေ၊ ရုံးမှတ်တမ်းတွေ၊ ဓါတ်ပုံနဲ့ပိုစတာတွေကို စစ်တပ်နဲ့ ရဲတွေက ဝင်ရောက်ဖျက်ဆီးသွားပြီး ရုံးအတွင်းရှိ ပစ္စည်းတွေကိုလည်း ခိုးယူသွားကြောင်း ဒေသခံတွေက ပြောပါတယ်။
“အဓိက ဗိုလ်ချုပ်ဓာတ်ပုံနဲ့ ရုံးမှတ်တမ်း ဖျက်ဆီးသွားပါတယ်။ အတွင်းရှိပစ္စည်း တချို့လည်း ခိုးယူသွားပါတယ်”လို့ ရုံးပိုင်းတာဝန်ယူခဲ့တဲ့ ညောင်ဦးလူငယ် မောင်မျိုးကျော်က ပြောပါတယ်။
Public Service Announcement
ရုံးအဆောက်အအုံကတော့ မသုံးတာကြာလို့ လေဒဏ်မိုးဒဏ်ကြောင့် ယခင်ကတည်းက ပျက်စီးခဲ့ကြောင်း သိရပါတယ်။
စစ်တပ်ဟာ ဗိုလ်ချုပ်အောင်ဆန်း၊ ဒေါ်အောင်ဆန်းစုကြည်နဲ့ NLD ပါတီတို့ရဲ့ ပုံရိပ်တွေကို မှေးမှိန်မေ့ပျောက်သွားစေဖို့ ရည်ရွယ်ပြုလုပ်နေတာဖြစ်ကြောင်း၊ ဒါပေမယ့် အဆောက်အအုံနဲ့အမှတ်အသားတွေကို ဖျက်ဆီးနိုင်သော်လည်း ပြည်သူလူထုရဲ့ ရင်ထဲကထောက်ခံမှုနဲ့ လေးစားချစ်ခင်မှုကို မူဖျက်ဆီးနိုင်မှာမဟုတ်ကြောင်းကို မကြာသေးမီက ပြုလုပ်ခဲ့တဲ့ ဒေါ်အောင်ဆန်းစုကြည်ရဲ့ (၈၁)နှစ်ပြည့်မွေးနေ့ လှုပ်ရှားမှုတွေက သက်သေပြနေကြောင်း ညောင်ဦးလူငယ် မောင်မျိုးကျော်က ပြောပါတယ်။
စစ်တပ်ဟာ အာဏာသိမ်းပြီးကတည်းက NLD ပါတီရုံးတွေကို ချိတ်ပိတ်တာ၊ ပစ္စည်းတွေကို သိမ်းယူတာ၊ ဆိုင်းဘုတ်တွေကအစ ဖြိုချဖျက်ဆီးတာတွေ ပြုလုပ်ခဲ့ပါတယ်။
ဒါ့အပြင် အာဇာနည်နေ့ နီးလာချိန်မှာပဲ ဗိုလ်ချုပ်အောင်ဆန်းရုပ်တုတွေကို ဖြိုချဖျက်ဆီးတာတွေပါ ပြုလုပ်နေပါတယ်။
