ရန်ကုန်မြို့ပြေးဆွဲနေတဲ့ အောက်‌ဆိုက်ကား တိမ်းမှောက်၊ ခရီးသည် ၄ ဦး ဒဏ်ရာရ

ဇူလိုင်-၁၄၊၂၀၂၆။ရောင်နီ/People’s Spring

ရန်ကုန်မြို့အတွင်း တရားမဝင်ပြေးဆွဲနေတဲ့ လိုက်ထရပ်ယာဉ် ၁စီး‌တိမ်းမှောက်ပြီး ခရီးသည် ၄ ဦး ဒဏ်ရာရရှိခဲ့တယ်လို့ သွားရောက်ကူညီခဲ့တဲ့ ကိုပူတူးနဲ့‌ဘော်ဒါများ အသင်းက အသိပေးထားပါတယ်။

ဒီနေ့(ဇူလိုင်၁၄) မနက်က သိမ်ဖြူလမ်းနဲ့ ကုန်သည်လမ်းထောင့်မှာ ယာဉ်တိမ်းမှောက်ခဲ့တာဖြစ်ပြီး လူနာ အမျိုးသား ၂ ဦးနဲ့ အမျိုးသမီး ၂ ဦးရှိတယ်လို့ သိရပါတယ်။

ဒဏ်ရာရရှိသူတွေမှာ အောင်မျိုးထိုက် ဆိုတဲ့ အမျိုးသားက သတိမေ့နေတာကြောင့် မိသားစုဝင်တွေသိရှိနိုင်ဖို့ လူနာရဲ့ ဝန်ထမ်းကဒ်ကို ဓာတ်ပုံရိုက်တင်ပေးထားပါတယ်။

Public Service Announcement

ယာဉ်တိမ်းမှောက်မှုဖြစ်တဲ့ လိုက်ထရပ်ကားတွေက တရားဝင်ပြေးဆွဲ‌နေတာ မဟုတ်ဘဲ စစ်တပ်လက်အောက်ခံ ယာဉ်ထိန်းရဲတွေကို လိုင်းကြေးပေးပြီး အောက်‌ဆိုက်ပြေးဆွဲနေကြတာဖြစ်ပါတယ်။

အဲဒီလိုက်ထရပ်တွေက ကားမောင်းကြမ်းသလို စည်းကမ်းလည်းမရှိကြဘူးလို့ ရန်ကုန်မြို့ခံတွေက ပြောပါတယ်။

“အောက်ဆိုက်ကားတွေက မောင်းတာအရမ်းကြမ်းတယ်စည်းကမ်းလည်းလုံးဝမရှိဘူး။လက်ကလေးထုတ်ပြတာနဲ့နောက်ကားကပေးလို့ရလား မရလားမသိဘူးအတင်းကျော်တက်တာ၊အောက်ဆိုက်ကားကိုယ့်ကားနားကပ်လာရင်ဝေးဝေးကရှောင်ကြတော့” လို့ ဖေ့စ်ဘွတ်ခ်အသုံးပြုသူတစ်ဦးက မှတ်ချက်ရေးသားထားပါတယ်။

အမျိုးသားဒီမိုကရေစီအဖွဲ့ချုပ်(NLD)ပါတီရဲ့ အစိုးရတာဝန်ယူချိန်က ရန်ကုန်မြို့တွင်း သွားလာရေးစနစ်အတွက် YBS စနစ်ကို စတင်ခဲ့ချိန်က အောက်ဆိုက်ကားတွေ မရှိသလောက်နည်းသွားခဲ့ပေမယ့် စစ်တပ်အာဏာသိမ်းပြီးနောက်ပိုင်းမှာ ပိုများပြားလာတာပါ။

အောက်ဆိုက်ကားတွေက ရန်ကုန်မြို့ရဲ့ ဆင်ခြေဖုံးရပ်ကွက်တွေမှာ ပြေးဆွဲမှုတွေများပြားပြီး ရန်ကုန်မြို့လယ်မှာလည်း ပြေးဆွဲနေကြတာပါ။

သခင်မြပန်းခြံကနေ ဂိတ်စ ၊ ဂိတ်ဆုံး ပြေးဆွဲတဲ့ အာဏာရှင်ဟောင်း နေဝင်းရဲ့ မြေးတွေ ပိုင်ဆိုင်နဲ့ Omni Focus ယာဉ်လိုင်းက ယာဉ်ပြေးဆွဲမှု အကန့်အသတ်ရှိတာကြောင့် အောက်‌ဆိုက်ကားတွေကို ပြည်သူတွေက အားကိုးနေကြရတာလို့ ဒေသခံတွေက ထောက်ပြထားပါတယ်။

ရက် ၁၀၀ စီမံကိန်းခေါင်းစဉ်တပ်ကာ ဥပဒေတွေ အမျိုးမျိုးထုတ်နေတဲ့ တရားမဝင်ရွေးကောက်ပွဲက တတ်လာတဲ့အာဏာသိမ်းစစ်တပ် တာဝန်ရှိသူတွေက အောက်ဆိုက်ကားတွေနဲ့ပတ်သက်ပြီး အရေးယူ‌ ဆောင်ရွက်ဖို့ တိုက်တွန်းတာ‌မျိုးတော့မရှိပါဘူး။