ဇူလိုင် ၂၀၊ ၂၀၂၆။ဟာနာဆန်/People’s Spring
စစ်ကိုင်းတိုင်း၊ မုံရွာမြို့နယ်၊ ချင်းတွင်းမြစ်အတွင်းမှာ စက်လှေတိမ်းမှောက်ပြီး အလုပ်ပြန် သင်္ဘောကျင်းလုပ်သား ၅ ဦး ပျောက်ဆုံးနေကြောင်း ဒေသခံတွေက ပြောပါတယ်။
ဒီကနေ့ ဇူလိုင် ၂၀ ရက် နေ့လယ် ၁ နာရီခန့်က မုံရွာမြို့နယ်၊ ကမ်းနားလမ်း၊ ချင်းတွင်းမြစ်အတွင်းမှာ အမျိုးသား (၆)ဦး၊ အမျိုးသမီး (၁)ဦး စုစုပေါင်း (၇)ဦး လိုက်ပါလာတဲ့ စက်တပ်လှေတစ်စီးတိမ်းမှောက်ခဲ့ကြောင်း၊ အမျိုးသား(၁)ဦး၊ အမျိုးသမီး(၁)ဦးကိုတော့ အသက်ရှင်လျက် ကယ်ဆယ်နိုင်ခဲ့ပေမဲ့ ကျန် အမျိုးသား (၅)ဦး ပျောက်ဆုံးနေလို့ ညနေပိုင်းအထိ ရှာဖွေနေရကြောင်း ဒေသခံတွေက ပြောပါတယ်။
“မုံရွာသင်္ဘောကျင်းကနေ အလုပ်လုပ်နေတဲ့ အလုပ်သမားတွေ စက်လှေနဲ့ သူတို့ရွာကို ပြန်တာမှာ မှောက်သွားတာ။ လောလောဆယ် စက်လှေကတော့ ပြန်တွေ့တယ်။ ပျောက်နေတဲ့ ယောကျာ်း ၅ ယောက်ကိုတော့ ဆက်ရှာနေတယ်။”လို့ ဒေသခံတစ်ဦးက ပြောပါတယ်။
Public Service Announcement
မုံရွာ ဇက်ဆိပ်ဟာ စစ်ကောင်စီတပ်ဖွဲ့ဝင်တွေ မကြာခဏ ဝင်ရောက်စစ်ဆေးဖမ်းဆီးလေ့ရှိတဲ့နေရာတစ်ခုဖြစ်ပြီး ပြီးခဲ့တဲ့ရက်ပိုင်းအတွင်းကပဲ လူငယ်အချို့ ပေါ်တာဆွဲခံလိုက်ရကြောင်း ဒေသခံတွေက ပြောပါတယ်။ လူငယ်တွေဟာ စစ်ကောင်စီတပ်ပေါ်တာဆွဲတဲ့အန္တရာယ်ကြားကနေ မြို့ပေါ်ကို အရဲစွန့်လာရောက်အလုပ်လုပ်ကိုင်နေကြရတာဖြစ်ပြီး ယခုလို သဘာဝဘေးအန္တရာယ်ကိုပါ ကြုံတွေ့ရင်ဆိုင်လိုက်ရတာဖြစ်ပါတယ်။
