ဩဂုတ်လ၁ရက် မနက်၉နာရီခွဲခန့်က ဖားကန့်မြို့၊ လုံးခင်းဆေးရုံကုန်းအနီးမှာအိမ်တစ်အိမ် ဓားပြတိုက်ခံနေရတာကိုသတင်းရတဲ့KIAနဲ့ KPDFကပစ်ခတ်တိုက်ခိုက်ခဲ့တာဖြစ်ပါတယ်။
ခမရ (၃၈၄)က တပ်ဖွဲ့ဝင်နှစ်ဦးသေဆုံးပြီး သေနတ်တစ်လက်ရရှိခဲ့တယ်လို့ KPDF နဲ့ နီးစပ်သူကပြောပါတယ်။
“တချို့ကထွက်ပြေးသွားတယ်လို့သိရတယ်။ စစ်ကောင်စီတပ်တွေက ဓားပြတိုက်နေတာ ခဏခဏပဲ။ အခုလို ပစ်ခတ်ဖမ်းဆီးရတာလည်း သုံးလေးကြိမ်ရှိပြီ”လို့ ၎င်းကပြောပါတယ်။
ဖားကန့်ကိုရောက်ရှိနေတဲ့စစ်ကြောင်းမှာစစ်ကောင်စီတပ်ဖွဲ့ဝင်တွေနဲ့အတူ ရှမ်းနီတပ်(SNA)၊မင်းဇေသန့်ဦးဆောင်တဲ့ ပြည်သူ့စစ်တပ်ဖွဲ့ဝင်တွေ အင်အားထောင်ချီပြီးပါဝင်ပါတယ်။အဲဒီစစ်ကြောင်း တွေက အရပ်သားပြည်သူတွေကိုဖမ်းဆီးမှုတွေ၊ သတ်ဖြတ်မှု တွေလည်းရှိနေပြီး ပြီးခဲ့တဲ့ ဧပြီလကနေဇူလိုင်လကုန်အထိ ဓားပြတိုက်မှုအကြိမ် ၅၀ ကျော် ကျူးလွန်ခဲ့တယ်လို့ ဒေသခံတွေက ပြောပါတယ်။
Public Service Announcement
ပြီးခဲ့တဲ့ဇွန်လ၁၆ရက်နေ့ကလည်း ဖားကန့်မြိုနယ်၊ နမ္မဖြစ်အုပ်စုထဲမှာ ဖြစ်ပွားနေတဲ့ ဓားပြတိုက်မှုကို ကိုKIA၊KPDFက သွားရောက်ဖမ်းဆီးစဉ်မှာ စစ်ကောင်စီတပ်ဖွဲ့ဝင်အချို့အပါအဝင် ငါးဦးဖမ်းမိခဲ့ပါတယ်။ဖားကန့်မှာဆိုးသွမ်းနေတဲ့ဓားပြအဖွဲ့ကို KIA၊KPDF အနေနဲ့ သေချာစုံစမ်းပြီး ထိထိရောက်ရောက်အရေးယူပေးဖို့လည်း ဒေသခံတွေကတောင်းဆိုနေကြပါတယ်။
လက်ရှိမှာ ဖားကန့်မြို့နယ်နဲ့ လုံးခင်းကျေးရွာအုပ်စုအတွင်း စစ်ကောင်စီစစ်ကြောင်းတွေရှိနေပါတယ်။ ထိပ်တိုက်ရင်ဆိုင်တိုက်ပွဲမဖြစ်ပွားသေးပေမယ့် KIA၊KPDFက မိုင်းဆွဲတိုက်ခိုက်တာတွေ၊ ဒရုန်းနဲ့ ဗုံးကြဲတာတွေနဲ့ လက်နက်ကြီးအပြန်အလှန်ပစ်ခတ်မှုတွေရှိနေပါတယ်။
ဇူလိုင် ၃၁ရက်မှာဖားကန့်မြို့နယ်ထဲက KIAတပ်မဟာ(၉)နယ်မြေကိုစစ်တပ်ကလေကြောင်းကနေဗုံးကြဲခဲ့ပါတယ်။ဒေသခံပြည်သူတွေအနေနဲ့ လေကြောင်းအန္တရာယ်နဲ့လက်နက်ကြီးအန္တရာယ်ကိုသတိပြုကြဖို့ KIAက သတိပေးထားပါတယ်။
