ခင်ဦးမှာ မူးမြစ်ရေကြီးလို့ ကျေးရွာ ၁၄ ရွာထက်မနည်း ရွှေ့ပြောင်း

သြဂူတ် ၇၊ ၂၀၂၆။ ဇေအောင်/People’s Spring

စစ်ကိုင်းတိုင်း၊ ခင်ဦးမြို့နယ်မှာ မူးမြစ်ရေကြီးမှုကြောင့် ကျေးရွာ ၁၄ ရွာထက်မနည်း နေရာရွှေ့ပြောင်းနေရပါတယ်။

ဒီကနေ့ သြဂုတ် ၇ ရက် မနက် ၁ နာရီခန့်ကစပြီး ခင်ဦးမြို့နယ်၊ မူးမြစ်(နတ်မူး)အရှေ့ဘက်နဲ့ DY-1 တူးမြောင်းအတွင်းရှိ ဥယျာဥ်၊ကျွန်းတောကြီး၊ယာတော်၊မကျီးအုပ်၊သရက်ပင်စု၊ကားဆိပ်၊မြင်းဒေါင်း၊အင်းပတ်၊ရွာသစ်၊မူးသာ၊သက်ပေး၊ဇီးတော၊လက်ပံကွက်၊တာတိုင်စတဲ့ ကျေးရွာတွေကို မူးမြစ်ရေတွေ စတင်ဝင်ရောက်နေလို့ ဒေသခံ ထောင်နဲ့ချီ ဘေးလွတ်ရာ ရေဘေးရှောင်နေရကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောပါတယ်။

“တစ်ညလုံး မအိပ်ရသေးဘူး။ မူးဘေးနားကရွာတွေအကုန်ရေနစ်နေပြီ”လို့ ဒေသခံတစ်ဦးက ပြောပါတယ်။

Public Service Announcement

မူးမြစ်ရေဟာ ခင်ဦးမြို့နယ်အပြင် ဒီပဲယင်း၊ ရေဦး၊ တန့်ဆည်နဲ့ စစ်ကိုင်း၊ ဝက်လက်၊ မြင်းမူနယ်ဘက်တွေအထိ သက်ရောက်မှာဖြစ်ပြီး အဆိုပါ ဒေသတွေမှာ ရေကြီးရေလျှံမှုတွေ ကြုံတွေ့နေရပြီဖြစ်ကြောင်း ဒေသခံတွေက ပြောပါတယ်​။

လက်ရှိ ကျွန်းလှနယ် သဖန်းဆိပ်ဆည်ကနေ ရေလွှတ်နေပြီး အဲဒီရေတွေဟာ ကာဘိုးဆည်ကနေတဆင့် ရေတံခါးတွေဖွင့်ထားတာကြောင့် မူးမြစ်အတွင်း ရောက်ကာအောက်ဘက်သို့ ဆက်လက်ဆင်းလာနေကြောင်း၊ မူးမြစ်ရေဟာ ယခုလက်ရှိ ရေပြင်ထက် ပိုပြီး တက်လာနိုင်တာကြောင့် မူးမြစ်ဘေး ကျေးရွာတွေ ရေဘေးအန္တရာယ်ကို သတိပြုကြဖို့နဲ့ ကောက်ပဲသီးနှံတွေကို ရေလွတ်ရာ အချိန်မီ ရွှေ့ပြောင်းကြဖို့ ရွှေဘိုခရိုင် ပြည်သူ့ကာကွယ်ရေးအဖွဲ့က အသိပေးထားပါတယ်။