ထိုင်းအစိုးရအိမ်တော်နားမှာမြေယာပိုင်ဆိုင်ခွင့်အရေးဆန္ဒပြသူတွေ ဆက်လက်စုဝေးနေ

သြဂုတ် – ၁၁ ၊၂၀၂၆

ထိုင်းနိုင်ငံ၊ ဘန်ကောက်မြို့တော်က အစိုးရ အိမ်တော်နားမှာ စုဝေးခဲ့တဲ့ ဆန္ဒပြသူ ၁၀၀ လောက်က နေရာကနေ ဖယ်ရှားပေးဖို့ ဆက်လက် ငြင်းဆိုနေဆဲ ဖြစ်ပါတယ်။

တရားမျှတတဲ့ လူ့အဖွဲ့အစည်းဆိုင်ရာ ပြည်သူ့ လှုပ်ရှားမှုလို့ ခေါင်းစဉ်တပ်ပြီး P-Moveလို့ အတိုကောက် ခေါ်ဝေါ်တဲ့ ဆန္ဒပြပွဲတွေဟာ ဩဂုတ် ၁၁ ရက်နေ့မှာ ၉ ရက် ကြာမြင့်လာပြီ ဖြစ်ပါတယ်။

ဆန္ဒပြသူတွေဟာမြေယာမဲ့တွေ၊လယ်သမားတွေနဲ့ ဒေသခံ လူ့အဖွဲ့အစည်းတွေရဲ့ မြေယာဆိုင်ရာ အခွင့်အလမ်းတွေကို ဥပဒေတွေနဲ့ အကာအကွယ်ပေးဖို့၊ အခုနှစ် စက်တင်ဘာလမှာ ဖျက်သိမ်းဖို့ ရည်ရွယ်ထားတဲ့ မြေယာဘဏ်ကို ဆက်လက် ထားရှိပေးဖို့ အဓိက တောင်းဆိုထားကြပါတယ်။

Public Service Announcement

ဩဂုတ် ၃ ရက်နေ့တုန်းက အင်အား ၁၀၀ လောက် ပါဝင်တဲ့ ဆန္ဒပြသူတွေဟာ အစိုးရ အိမ်တော်ဆီ ချီတက်ပြီး အိတ်ဖွင့်ပေးစာ တစ်စောင်ကို ပေးအပ်ခဲ့ပါတယ်။ အဲဒီနောက် ဩဂုတ် ၄ ရက်မှာတော့ အစိုးရ ကိုယ်စားလှယ်တွေနဲ့ ကနဦးအဆင့် ဆွေးနွေးမှုတွေ လုပ်ဆောင်နိုင်ခဲ့ပါတယ်။

P-Move ဆန္ဒပြသူတွေက အစိုးရ အနေနဲ့ မြေယာဘဏ်ရဲ့ လုပ်ငန်း လည်ပတ်မှု သက်တမ်းကို အနည်းဆုံး တစ်နှစ်လောက် ထပ်တိုးပေးဖို့ စဉ်းစားဖွယ်ရှိကြောင်း ကတိကို လက်တွေ့ အကောင်အထည် ဖော်ပေးဖို့ ဆက်လက် တိုက်တွန်းနေပါတယ်။

ဩဂုတ်လ ၆ ရက်နေ့မှာတော့ P-Move လှုပ်ရှားမှုမှာ ပါဝင်သူ တချို့က ပြည်ထဲရေး ဝန်ကြီးဌာန အာဏာပိုင်တွေနဲ့ တွေ့ဆုံဖို့ ကြိုးစားခဲ့ပေမယ့် အဆောက်အအုံထဲ ဝင်ခွင့်မရခဲ့သလို ပဋိပက္ခ အခြေအနေတွေ ဖြစ်ပွားပြီး ဆန္ဒပြသူ သုံး ဦး ဒဏ်ရာရခဲ့ပါတယ်။

P-Moveကတောင်းဆိုထားတဲ့အချက်တွေထဲမှာမြေယာဘဏ်ဖျက်သိမ်းမှု အစီအစဉ်နဲ့ ပတ်သက်လို့ ဒုတိယ ဝန်ကြီးချုပ် တစ်ဦးဖြစ်တဲ့ ပါကွန် နီလ်ပရာပွန်ရဲ့ ပါဝင်ပတ်သက်မှု အခန်းကဏ္ဍကို အစိုးရက ပြန်သုံးသပ်ပေးဖို့၊ ဘဏ်ကွပ်ကဲမှု တာဝန်တွေကို ဒုတိယ ဝန်ကြီးချုပ် နောက်တစ်ဦးဖြစ်တဲ့ ဆွန်ဆတ် သောင်သရီဆီ ယာယီ လွှဲပြောင်းပေးဖို့ ဆိုတာတွေ ပါဝင်ခဲ့ပါတယ်။

နောက်ပြီးဆန္ဒပြသူတွေဟာဝန်ကြီးချုပ်အနုတင်ချန်ဝီယာကူနဲ့လည်း တိုက်ရိုက်ဆွေးနွေးခွင့်တောင်းဆိုထားပြီးဒေသခံလူထုမြေယာပိုင်ဆိုင်ခွင့် အစီအမံတွေ၊မြေယာပြန်လည်ခွဲဝေပေးရေးကိစ္စတွေနဲ့ အမြဲတမ်းမြေယာဘဏ်တစ်ခု တည်ထောင်နိုင်ရေး ဖြစ်နိုင်ခြေတွေကို ရှင်းရှင်းလင်းလင်း သိခွင့်ရလိုကြောင်း ပြောကြားထားကြပါတယ်။

တကယ်လို့ အစိုးရက မြေယာဘဏ်ကို ဖျက်သိမ်းမယ့် အစီအစဉ်အတိုင်း ဆက်လက် လုပ်ဆောင်မယ် ဆိုရင်တော့ P-Moveရဲ့ ဆန္ဒပြမှုတွေကို ရက်အကန့်အသတ်မရှိ ရေရှည် ချဲ့ထွင်သွားမယ်လို့လည်း သတိပေးထားပါတယ်။

ကိုးကား – Thai Enquirer