ရွှေဘိုမှာ ရေဘေးသင့်ကိုယ်ဝန်ဆောင်ကို တော်လှန်ရေးရဲဘော်တွေ လှေနဲ့ကယ်ထုတ်ပြီး မွေးဖွားပေး

သြဂုတ် ၁၂၊ ၂၀၂၆။ People’s Spring

စစ်ကိုင်းတိုင်း၊ ရွှေဘိုမြို့နယ်၊ ရေဘေးသင့်ဒေသက ကိုယ်ဝန်ဆောင်အမျိုးသမီးတစ်ဦးကို တော်လှန်ရေးရဲဘော်တွေက လှေနဲ့ကယ်ထုတ်ပြီး ကလေးကို အောင်မြင်စွာ မွေးဖွားပေးနိုင်ခဲ့ပါတယ်။

သြဂုတ် ၉ ရက်က ရွှေဘိုမြို့နယ်၊ ရေဘေးသင့်ဒေသတစ်ခုက ကိုယ်ဝန်ဆောင်အမျိုးသမီးကို စစ်ကိုင်းဖက်ဒရယ်ယူနစ်ကြားကာလအစိုးရရဲ့ ရွှေဘိုမြို့နယ် ပအဖ အဖွဲ့ဝင်တွေနဲ့၊ လူသားစာနာတာဝန်ခံတို့က လှေနဲ့ကယ်ထုတ်ကာ ကလေးမွေးဖွားပေးပြီး လှည်းနဲ့ ဘေးလွတ်ရာ နေရာကို ပို့ပေးနိုင်ခဲ့တယ်လို့ ပကဖအသံက ဖော်ပြပါတယ်။

စစ်ကိုင်းဖက်ဒရယ်ယူနစ်ကြားကာလအစိုးရ ရွှေဘို ပအဖ အဖွဲ့ဝင်တွေ၊ လူသားစာနာတာဝန်ခံတို့အနေနဲ့ နောက်ထပ် ကိုယ်ဝန်ဆောင်အမျိုးသမီးတွေကို ကယ်တင်ဖို့ကြိုးစားနေကြသလို အခြားမြို့နယ်တွေမှာလည်း လူသားစာနာ‌‌ကူညီမှုတွေ ကြိုးစားဆောင်ရွက်နေကြတယ်လို့ သိရပါတယ်။

Public Service Announcement

ရွှေဘိုမြို့က အာဏာသိမ်းစစ်တပ်ရဲ့ ရဲတပ်ဖွဲ့ဟာ ရေဘေးသွားလှူ​မယ့်သူတွေကို နေအိမ်ချိတ်ပိတ်မယ်လို့ ခြိမ်းခြောက်ပြီး ရေဘေးအလှူကို တားမြစ်နေကြောင်း ဒေသခံတွေက ပြောပါတယ်။

ရွှေဘိုမြို့နယ်က ကြောင်ရှာတောကျေးရွာ၊ ရေကြည်ဝကျေးရွာ၊ ထူးကြီးကျေးရွာ၊ တည်ပင်ကျေးရွာ၊ သန်းတောကျေးရွာ၊ သံပုရာခြံကျေးရွာ၊ မအူပင်ကျေးရွာ၊ ရုံးတောကျေးရွာ၊ ညောင်ကိုင်းကျေးရွာ၊ ညောင်ပင်လှကျေးရွာ၊ သောင်ထွဠ်ကိုင်းကျေးရွာ၊ ကူတိုးဆိပ်ကျေးရွာ၊ ရေတော်မူကျေးရွာ၊ ဝန်းစည်ကျေးရွာ၊ သပွတ္တောကျေးရွာ၊ မင်းပေးကျေးရွာ၊ တညင်းကုန်းကျေးရွာ စတဲ့ ကျေးရွာ (၁၇)ရွာ ရေဘေးဒုက္ခ ကြုံနေရပြီး အိမ်ထောင်စုပေါင်း(၄၇၇၈)စုလူဦးရေစုစုပေါင်း(၁၉၅၉၃)ဦး ရေဘေးအန္တရာယ်တွေ့ကြုံခံစားနေရတယ်လို့ ရွှေဘိုပကဖက ထုတ်ပြန်ထားပါတယ်။