ဩဂုတ်-၂၀၊ ၂၀၂၆။ဒလပန်း/People’s Spring
မွန်ပြည်နယ်၊ ကျိုက်ထိုမြို့နယ်မှာ ကျောင်းသားဘောလုံးပြိုင်ပွဲ ကျင်းပနေတဲ့ ဘောလုံးကွင်းအနီး စစ်တပ် ပစ်ခတ်တဲ့ လက်နက်ကြီးကျည် ကျပေါက်ကွဲခဲ့တာကြောင့် (၅)နှစ်အရွယ် မူလတန်း ကလေးငယ် ၁ဦး သေဆုံးခဲ့ပြီး ၁၁ ဦး ထိခိုက်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
မနေ့က ဩဂုတ် ၁၉ နံနက် ၁၁ နာရီခန့်မှာ ကျိုက်ထိုမြို့နယ် ၅ ဇီးပြောင်းကျေးရွာ ဘောလုံးကွင်းအနီးကို စစ်တပ်ရဲ့ သိမ်ဇရပ်အမြောက်တပ် (၃၁၀)က လက်နက်ကြီးနဲ့ ပစ်ခတ်ခဲ့တာလည်းဖြစ်ပါတယ်။
“ တိုက်ပွဲ ဖြစ်တာမျိုးလည်းမရှိဘူး။ ကျောင်းသားဘောလုံးပြိုင်ပွဲလုပ်နေကြတာ။ အဲ့ချိန်ကွင်းဘေးက အိမ်ကိုကျတာ “ လို့ ဒေသခံတစ်ဦးကပြောပါတယ်။
Public Service Announcement
စစ်တပ်ပစ်ခတ်လိုက်တဲ့ လက်နက်ကြီးဟာ ကျောင်းသားဘောလုံးပြိုင်ပွဲ ကျင်းပနေတဲ့ ဘောလုံးကွင်း ကပ်ရပ် နေအိမ်ပေါ် ကျရောက်ပေါက်ကွဲခဲ့တာကြောင့် အသက် (၅)နှစ်အရွယ် မူလတန်း ကလေးငယ် ၁ဦး ဦးခေါင်းထိမှန် သေဆုံးပြီး ကလေးငယ် ၇ဦးနဲ့ လူကြီး ၄ဦး ထိခိုက်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
ဒါ့အပြင် နေအိမ်တစ်လုံးလည်း ပျက်စီးခဲ့ပါတယ်။
ထိခိုက်ဒဏ်ရာပြင်းထန်ခဲ့တဲ့ လူနာတွေကို ရန်ကုန်နဲ့ ပဲခူးဆေးရုံကြီး ပို့ဆောင်ထားပြီး တခြားထိခိုက်လူနာတွေကတော့ သိမ်ဇရပ်ဆေးရုံမှာ ဆေးကုသခံယူနေတယ်လို့ သိရပါတယ်။
(လက်နက်ကြီးထိမှန်မှုကြောင့် ပျက်စီးခဲ့မှုများ။
ဓာတ်ပုံ – ပဲခူးခရိုင်ပကဖ )
