စက်တင်ဘာ ၂၊၂၀၂၆။ဇော်ရမ်း/People’s Spring
ရှမ်းပြည်နယ်မြောက်ပိုင်း၊ ကျောက်မဲမြို့မှာ ဒီကနေ့စက်တင်ဘာ ၂ရက် မနက်ပိုင်းက ကျယ်လောင်တဲ့ပေါက်ကွဲသံထွက်ပေါ်လာလို့ ဒေသခံတွေ စိုးရိမ်နေကြပါတယ်။
မနက် ၆နာရီခန့်မှာ ကျောက်မဲမြို့ရဲ့ တောင်ဘက်ကနေ ကျယ်လောင်နဲ့ပေါက်ကွဲသံထွက်ပေါ်လာတာလို့ မြို့ခံတွေက ပြောပါတယ်။
” အခုရက်ပိုင်းမှာ လေယာဉ်တွေလည်းဝဲတယ်။ ပေါက်ကွဲသံနဲ့ကြားတယ်ဆိုတော့ အရမ်းကြောက်လာတယ်။ ပေါက်ကွဲသံက ပြင်းတယ်။ ရှော့တိုက်ဒုုန်းကျတာလို့လည်း ပြောနေကြတယ်” လို့ မြို့ခံတစ်ဦးက ပြောပါတယ်။
Public Service Announcement
ကျောက်မဲမြို့ဟာ ၂၀၂၃ အောက်တိုဘာ ၂၇ရက်ကစတင်ခဲ့တဲ့ ၁၀၂၇ စစ် ဆင်ရေးနဲ့အတူ တအာင်းအမျိုးသားလွတ်မြောက်ရေးတပ်မတော်((TNLA)က သိမ်းယူခဲ့ပြီး ၂၀၂၅ အောက်တိုဘာမှာ စစ်တပ်ကပြန်လည် ထိန်းချုပ်သွားတဲ့ မြို့ဖြစ်ပါတယ်။
ပြီးခဲ့တဲ့ ဇူလိုင်ကစတင်ပြီး ကျောက်မဲမြို့အပါအဝင် ရှမ်းပြည်နယ်မြောက်ပိုင်းကမြို့နယ် တွေမှာ စစ်တပ်ရဲ့ကင်းထောက်လေယာဉ်နဲ့ဗုံးကြဲလေယာဉ်တွေ ပျံသန်းမှုတွေခပ်စိပ်စိပ် ဖြစ်လာတယ်လို့ဒေသခံတွေက ပြောပါတယ်။
ဇူလိုင်၁၃ရက်ကတော့ ကျောက်မဲမြို့ပေါ်ကို တိုက်လေယာဉ် ၁စီး နိမ့်နိမ့်လေး ဖြတ်ပျံသွားခဲ့လို့ ဒေသခံတွေကြောက်လန့်ခဲ့ကြရပါတယ်။
ဒီနေ့မနက်ဖြစ်ပွားတဲ့ ပေါက်ကွဲမှုနဲ့ပတ်သက်ပြီး အသေးစိတ်အခြေအနေကို မသိရသေးပါဘူး။
ကျောက်မဲမြို့နဲ့ဆက်စပ်နေတဲ့ သီပေါနဲ့လားရှိုးမြို့မှာလည်း စစ်တပ် ကင်းထောက်လေယာဉ်ပျံသန်းမှုတွေအပြင် ပြီးခဲ့တဲ့ဇူလိုင်က ရှော့တိုက်ဒုန်းပစ်ခတ်ခံရမှုလည်း ဖြစ်ပွားခဲ့ပါတယ်။
မန္တလေး- မူဆယ် ပြည်ထောင်စုလမ်းပိုင်းမှာ နောင်ချို၊ ကျောက်မဲ၊ သီပေါ၊ လားရှိုး၊သန္နီ၊ကွတ်ခိုင်၊မူဆယ်မြို့တို့ပါဝင်ပါတယ်။ စစ်တပ်က နောင်ချို၊ ကျောက်မဲ၊ သီပေါနဲ့ လားရှိုးမြို့ ပေါ် တွေကိုပဲ ထိန်းချုပ်ထားနိုင်ပြီး ကျေးရွာတွေနဲ့သန္နီ၊ကွတ်ခိုင်မြို့ကိုမြန်မာအမျိုးသားဒီမိုကရက်တစ်မဟာမိတ်တပ်မတော် ( MNDAA)၊နမ့်ဖက်ကာမြို့ကို ကချင်လွတ်လပ်ရေးတပ်မတော်(KIA)၊မူဆယ်မြို့နယ်ထဲကနယ်စပ်ကုန်သွယ်ရေးဂိတ်ဖြစ်တဲ့ ကျင်စန်းကျော့နဲ့၁၀၅ မိုင်ကုန်သွယ်ရေးဇုန်ကိုမြောက်ပိုင်းမဟာမိတ်သုံးဖွဲ့ကထိန်းချုပ်ထားပါတယ်။
စစ်တပ်က မန္တလေး- မူဆယ်ကုန်သွယ်ရေးလမ်းကို အမြန်ဆုံးပြန်ဖွင့်ချင်နေပါတယ်။နယ်စပ်ကုန်သွယ်ရေးဟာအစိုးရအချင်းချင်းဆောင်ရွက်ရတာဖြစ်လို့ ဘယ်ကြားခံအဖွဲ့အစည်းမှ မလိုအပ်ဘူးလို့ ဇူလိုင် ၉ရက်က ပြုလုပ်တဲ့ အိန္ဒိယ-မြန်မာ-ထိုင်း ၃နိုင်ငံအဝေးပြေးလမ်းမကြီးစီမံကိန်းနဲ့ ကုလားတန်မြစ်ကြောင်း ဘက်စုံသုံးဖြတ်သန်းသယ်ယူပို့ဆောင်ရေးစီမံကိန်းဆိုင်ရာညှိနှိုင်းအစည်းအဝေးမှာ စစ်ခေါင်းဆောင်မင်းအောင်လှိုင်ကပြောခဲ့ပါတယ်။
စစ်တပ်က မန္တလေး- မူဆယ်ပြည်ထောင်စုလမ်းပိုင်းကို ပြန်ထိန်းချုပ်လိုပေမယ့် တော်လှန်ရေးတပ်တွေကလက်မခံတဲ့အတွက် အခြေအနေတွေပိုမို ရှုပ်ထွေးလာလိမ့်မယ်လို့ ရှမ်းမြောက်သတင်းရင်းမြစ်တွေက ပြောပါတယ်။
