စစ်ကိုင်းတိုင်း ဝန်းသိုမြို့နယ်ရှိချောင်းများအတွင်း စစ်ကောင်စီအတွက် ငွေကြေးအထောက်အပံ့ဖြစ်စေသည့် ရွှေတူးဖော်မှုများကို ဒီဇင်ဘာလ ၂၆ ရက် နောက်ဆုံးထားကာ အပြီးတိုင် ဖယ်ရှားရှင်းလင်းပေးရန် ဝန်းသို PDFက အသိပေးခဲ့သည်။
ဝန်းသိုမြို့နယ် ပြည်သူ့ကာကွယ်ရေးတပ်ဖွဲ့က ဒီဇင်ဘာလ ၂၄ ရက်တွင် အသိပေးကြေညာချက် တစ်စောင်ထုတ်ပြန်ခဲ့ပြီး အဆိုပါထုတ်ချက်ချက်တွင် ဝန်းသိုမြို့နယ်အတွင်းရှိ ချောင်းများတွင် ဘတ်ဟိုးများဖြင့် လောဘတိုက်ပြီး ချောင်းကောစေကာ မိဘပြည်သူများ စိတ်အနှောင့်အယှက်ဖြစ်စေခဲ့သည့် စစ်ကောင်စီ၏ ထောက်တိုက်များကို ငွေကြေးထောက်ပံ့မှုများ လုံးဝရပ်တန့်သွားရန်နှင့် ယနေ့မှစ၍ ၃ ရက်အတွင်း ချောင်းများ၌ ရွှေတူးဖော်မှုများကို အပြီးတိုင်ရှင်းလင်းဖယ်ရှားပေးရန် ကြေညာခဲ့သည်။
ဝန်းသိုဒေသသည် နေရာအနှံ့၌ ရွှေထွက်လေ့ရှိပြီး ကုမ္ပဏီများ ဝင်လာပြီးနောက်ပိုင်းတွင် အလွန်အကျွံ ရွှေထုတ်ယူမှုများကြောင့် သဘာဝပတ်ဝန်းကျင် ပျက်စီးမှုများ ဖြစ်ပေါ်နေကြောင်း ဒေသခံများက ပြောကြားသည်။
ဒီဇင်ဘာလ ၂၆ ရက် ကုန်လွန်သွားသည့်တိုင်အောင် ဆက်လက်လုပ်ကိုင်နေသည်ကို တွေ့ရှိရပါကထိရောက်သည့် အရေးယူမှုအပြင် ဖြစ်ပေါ်လာမည့် အသက်အန္တရာယ်ထိခိုက်မှုများကို လုံးဝတာဝန်ယူမည်မဟုတ်ကြောင်း ဝန်းသို PDFက အသိပေးတားမြစ်ခဲ့သည်။
Public Service Announcement
“ဒီကြေညာချက်ကတော့ တော်တော့်ကို အကိုင်အတွယ်ခက်တဲ့ပြဿနာလို့ မြင်တယ်။ စကစ နဲ့ ထောက်တိုင်တွေအတွက် မျက်ခုံးလုပ်နေလိမ့်မယ်၊ လုပ်နေတဲ့သူတွေထဲမှာ နယ်ခံတွေပါဝင်တယ်လို့ သိရတယ်။ အခြားနယ်ကနေ အမြတ်ထုတ် ဂုတ်သွေးစုပ်သွားတဲ့ သူတွေတော့ အဓိကပေါ့၊ ချောင်းပျက်စီးလို့ အဓိက လည်စီးခံရမှာက တို့မြို့သား၊သူ တွေပဲ။ အခုလည်း စတင်ခံစားနေရပြီ။ PDF အနေနဲ့ လတ်တလောမှာ နယ်မြေပြန်လည်စိုးမိုးထိန်းချုပ်ဖို့ ကြိုးစားလာပြီဆိုတာ အချို့သောဖြစ်ရပ်များနဲ့ ဒီကြေငြာချက်က သက်သေထူနေတယ်လို့ မြင်တယ်” ဟုဝန်းသိုဒေသခံတစ်ဦးက ပြောသည်။
ဝန်းသိုမြို့နယ်တွင်လည်း အကြမ်းဖက်စစ်ကောင်စီအား ခုခံတိုက်ခိုက်မှုများ ဖြစ်ပွားလျက်ရှိသည်။
