ဆော်ဒီအာရေးဘီးယားရဲ့ ကာကွယ်ရေး ကဏ္ဍအတွက် ဝေဟင်ဆီဖြည့် အထောက်အပံ့မျိုး ကူညီပေးသွားမယ်လို့ ဗြိတိန် အစိုးရက ပြောပါတယ်။
ယီမင်အခြေစိုက် ဟိုသီ ပြောက်ကျားတပ်ဖွဲ့တွေနဲ့ ဆော်ဒီတို့ကြား ယီမင်နိုင်ငံမှာ တိုက်ပွဲတွေ ပြင်းထန်လာချိန်မှာ ဗြိတိန် ဝန်ကြီးချုပ် အန်ဒီ ဘန်ဟမ်းက အခုလို ပြောကြားခဲ့တာပါ။ ဟိုသီတွေကလည်း ဆော်ဒီ ပိုင်နက်ထဲထိ ဒုံးကျည်တွေ၊ ဒရုန်းတွေနဲ့ လှမ်းပြီး ပစ်ခတ် တိုက်ခိုက်နေပါတယ်။
စက်တင်ဘာ ၂၁ ရက်နေ့မှာ ဘန်ဟမ်းက ဗြိတိန်ရဲ့ ဝေဟင်ဆီဖြည့် အထောက်အပံ့ ပေးမှုဟာ ဆော်ဒီရဲ့ ပိုင်နက်လုံခြုံမှုကို ကာကွယ်မယ့် စစ်ဆင်ရေးတွေ အတွက်သာ ဖြစ်မယ်လို့ အခိုင်အမာ ပြောကြားခဲ့ပါတယ်။ တစ်နည်းအားဖြင့် ယီမင်မှာ ဆင်နွှဲနေတဲ့ ဆော်ဒီရဲ့ စစ်ဆင်ရေးတွေနဲ့တော့ ဗြိတိန်က ကင်းကင်းနေမယ်ဆိုတဲ့ သဘောပါ။
အသေးစိတ်ကို မထုတ်ပြန်သေးပေမယ့် ဆိုက်ပရပ်စ်မှာ အခြေစိုက်ထားတဲ့ ဗြိတိန်လေတပ်ရဲ့ Voyager ဆီဖြည့်လေယာဉ် တစ်စီးတည်းကိုသာ အဲဒီ မစ်ရှင်အတွက် အသုံးပြုမယ်လို့ ယုံကြည်ရပါတယ်။ ပြီးတော့ ဆော်ဒီကို အကူအညီ ပေးမှုကို ရက်ပိုင်းအတွင်း စတင်လာဖွယ် ရှိပါတယ်။
Public Service Announcement
ဆော်ဒီဆီက စစ်ရေးအကူအညီ တောင်းခံမှုကို လက်ခံရရှိခဲ့ကြောင်း၊ အဲဒီနောက် သူဟာ ကာကွယ်ရေး ဝန်ကြီး ဝက်စ်စထရိတင်း၊ နိုင်ငံခြားရေး ဝန်ကြီး အက်ဒ် မီလီဘန်းတို့နဲ့ ဆွေးနွေး တိုင်ပင်ပြီး အခုဆုံးဖြတ်ချက်ကို ချမှတ်ခဲ့ကြောင်းလည်း ဘန်ဟမ်းက ဆိုပါတယ်။
အီရန်က ကျောထောက်နောက်ခံ ပေးထားတဲ့ ဟိုသီတွေဟာ နိုင်ငံတကာ အသိအမှတ်ပြု ယီမင်အစိုးရနဲ့ ပြည်တွင်းစစ် ဆင်နွှဲနေတာပါ။ ဆော်ဒီ ဦးဆောင်တဲ့ အာရပ် မဟာမိတ် တပ်ပေါင်းစုကတော့ ယီမင် အစိုးရဖက်က ကူညီ တိုက်ခိုက်နေပါတယ်။
ပြီးခဲ့တဲ့ ရက်ပိုင်းမှာတော့ ယီမင်အနောက်ဖက်ခြမ်း ဒေသတွေမှာ ပြည်တွင်းစစ်က ပိုပြီး ပြင်းထန်လာသလို ဟိုသီတွေကလည်း ဆော်ဒီရဲ့ မြို့တော် ရီယတ်ဒ်နဲ့ ပင်လယ်နီ ဆိပ်ကမ်းတလျှောက်က ရေနံနဲ့ လောင်စာ ထုတ်လုပ်ရေး အဆောက်အအုံတွေကို ဒရုန်းတွေ၊ ဒုံးကျည်တွေနဲ့ တိုက်ခိုက်လာပါတယ်။
ဗြိတိန်က ဝေဟင်ဆီဖြည့် အထောက်အပံ့ ပေးမှာက ဆော်ဒီ လေပိုင်နက်ထဲ ဝင်လာမယ့် ဟိုသီ ဒရုန်းနဲ့ ဒုံးကျည်တွေကို ကြားဖြတ် ပစ်ချမယ့် ဆော်ဒီ တိုက်လေယာဉ်တွေ အတွက်ပဲဖြစ်ပြီး ယီမင်မှာ ဗုံးသွားကြဲမယ့် တိုက်လေယာဉ်တွေအတွက် မဟုတ်ပါဘူး။
ပြီးခဲ့တဲ့ သီတင်းပတ်မှာတော့ NATO စစ်မဟာမိတ် အဖွဲ့ရဲ့ အတွင်းရေးမှူးချုပ် မတ်ခ်ရူတေးက ဥရောပ နိုင်ငံတွေက ဆော်ဒီကို အတိုင်းအတာ တစ်ခုထိ ဝင်ကူတာမျိုး ဖြစ်နိုင်ကြောင်း မှတ်ချက်ပေးခဲ့ပါတယ်။
ဥရောပ နိုင်ငံ ခေါင်းဆောင်တွေ အချင်းချင်း ဖုန်းဆက်ပြီး ဆော်ဒီကိစ္စကို ဘယ်လို ကိုင်တွယ်မလဲ ဆိုတာမျိုး ဆွေးနွေးနေကြမယ် ဆိုရင် သူကတော့ အံ့ဩမှာ မဟုတ်ကြောင်း၊ ဘာတွေ ဖြစ်လာမလဲ ဆိုတာကို စောင့်ကြည့်ရမှာဖြစ်ကြောင်း၊ NATOဟာ ကူညီနိုင်တဲ့ ကိစ္စတွေမှာ ဝင်ကူဖို့ အမြဲတမ်း လိုလိုလားလား ရှိနေကြောင်း ရူတေးက ပြောကြားသွားပါတယ်။
၂၀၂၄ ခုနှစ်၊ ဇန်နဝါရီလတုန်းက ဗြိတိန်ဟာ အမေရိကန်နဲ့ ပူးပေါင်းပြီး ယီမင်မှာ ဟိုသီတွေကို လေကြောင်းကနေ တိုက်ခိုက်ခဲ့ပါတယ်။ အဲဒီတုန်းက ဗြိတိန် ဝန်ကြီးချုပ် တာဝန်ယူထားသူ ရီရှီဆူနက်ခ်ကတော့ ဟိုသီတွေဟာ တော်ဝင်ရေတပ် စစ်သင်္ဘော တစ်စီး အပါအဝင် ရေယာဉ်တွေကို ပစ်မှတ်ထား တိုက်ခိုက်လာလို့ ဗြိတိန်က ကိုယ့်ကိုယ်ကိုယ် ကာကွယ်တဲ့ အနေနဲ့ အခုလို တိုက်ခိုက်ခဲ့တာဖြစ်ကြောင်း ဖြေရှင်းခဲ့ပါတယ်။ အဲဒီနှစ်ထဲမှာ ဗြိတိန်ဟာ အမေရိကန်နဲ့ ပူးပေါင်းပြီး ဟိုသီတွေအပေါ် နောက်ထပ် လေကြောင်းတိုက်ခိုက်မှုတွေလည်း လုပ်ဆောင်ခဲ့ပါသေးတယ်။
ကိုးကား: BBC
