စက်တင်ဘာ – ၂၉ ၊၂၀၂၆
ကြိုတင်ကြေညာထားတဲ့အတိုင်းရွှေ့ပြောင်းဒုက္ခသည်ဦးရေ ၁,၅၀၀ လောက်ကိုမြန်မာဆီပြန်ပို့တဲ့အစီအစဉ်ကို မလေးရှားက ဒီနေ့ (စက်တင်ဘာ ၂၉ ရက်) မှာ စတင် အကောင်အထည် ဖော်နေပြီ ဖြစ်ပါတယ်။
ရိုဟင်ဂျာ အများစု ပါဝင်တယ်လို့ ယုံကြည်ရတဲ့ ဒုက္ခသည် ၁,၅၀၀ ဝန်းကျင်လောက်ကို ပထမ အသုတ်အဖြစ် မြန်မာဆီ ပြန်ပို့ဖို့ မလေးရှား အစိုးရက စီစဉ်ထားတာ ဖြစ်ပါတယ်။
မလေးရှား ဝန်ကြီးချုပ် အန်ဝါ အီဘရာဟင်က မလေးရှားရောက် ဒုက္ခသည်တွေထဲက ဆန္ဒအလျောက် နေရပ်ပြန်လိုသူ ၅,၀၀၀ လောက်ကို လက်ခံဖို့ အာဏာသိမ်း မြန်မာစစ်တပ်က သဘောတူ လက်ခံထားကြောင်း ဇူလိုင်လတုန်းက ပြောကြားဖူးပါတယ်။
Public Service Announcement
စက်တင်ဘာ ၂၉ ရက်မှာတော့ ရဲအစောင့်အရှောက်တွေနဲ့အတူ ဒါဇင်နဲ့ချီ များပြားတဲ့ ဘတ်စ်ကားတွေဟာ မလေးရှားနိုင်ငံ အနောက်မြောက်ဖက်က လူမွတ် ရေတပ်စခန်းနားက မက်ဂျ်လစ် ပါဘန်ဒါရန် မန်ဂျွန် အားကစားရုံကြီးဆီ ဆက်တိုက် ရောက်ရှိလာနေခဲ့ပါတယ်။
အာဏာပိုင်တွေက အားကစားရုံထဲကိုတော့ သတင်းထောက်တွေကို ဝင်ခွင့် မပေးပါဘူး။
အားကစားကွင်းထဲ စုဝေးရောက်ရှိနေတဲ့ ဒုက္ခသည်တွေရဲ့ အချက်အလက်တွေကို မှတ်တမ်းတင်ပြီးရင်တော့ ရေတပ်စခန်းဆီ လွှဲပြောင်းပေးပြီး အဲဒီကမှ မြန်မာဖက်ဆီ သင်္ဘောနဲ့ ပြန်ပို့တာပါ။
မလေးရှားအာဏာပိုင်တွေဘက်က ထုတ်ပြန်လာတဲ့ ဓာတ်ပုံမှာတော့ ဆိပ်ကမ်းမှာ ဆိုက်ကပ်ထားတဲ့ အာဏာသိမ်းမြန်မာရေတပ်ရဲ့စစ်ရေယာဉ်တွေဖြစ်တဲ့မုတ္တမ ၊ ဆင်ဖြူရှင်စစ်ရေယာဉ်နှစ်စီးပေါ်လူတွေတင်ပေးဖို့ပြင်ဆင်နေတာတွေ့ရပါတယ်။
အစောပိုင်း သတင်းတွေတုန်းက မလေးရှားဟာ ရိုဟင်ဂျာ အများစုပါဝင်တဲ့ ရွှေ့ပြောင်း ဒုက္ခသည် ၁,၅၀၀ ကို မြန်မာဖက် ပြန်ပို့မယ်လို့ ဖော်ပြခဲ့ဖူးပေမယ့် လက်ရှိ ပြန်ပို့မယ့်သူတွေက ရိုဟင်ဂျာတွေလား ဆိုတာကို မလေးရှား အာဏာပိုင်တွေက ရှင်းလင်း ပြောဆိုထားတာ မရှိပါဘူး။
မြန်မာကနေ မလေးရှားကို ရောက်ရှိနေတဲ့ ဒုက္ခသည် ၁၉,၀၀၀ ထဲမှာ သုံးပုံနှစ်ပုံလောက်ကတော့ ရိုဟင်ဂျာတွေ ဖြစ်တယ်လို့ ကုလသမဂ္ဂ (UN)က ထုတ်ပြန်ထားပါတယ်။
မလေးရှားမှာ ရိုဟင်ဂျာတွေနဲ့ ဒေသခံ လူ့အဖွဲ့အစည်းတွေကြား ပဋိပက္ခ အခြေအနေ တချို့ကလည်း ဒုက္ခသည်တွေကို မြန်မာဖက် ပြန်ပို့ဖို့ မလေးရှား အစိုးရအပေါ် ဖိအားပိုများလာစေခဲ့ပါတယ်။
လဆန်းပိုင်းမှာတော့ အာဏာသိမ်း မြန်မာစစ်တပ်က ပြည်ပရောက် နိုင်ငံသားတွေကို ဘေးကင်းပြီး ဂုဏ်သိက္ခာရှိရှိ နေရပ်ပြန်လာခွင့် ရစေမယ်လို့ အာမခံခဲ့ပါတယ်။
ပြီးတော့ ဝန်ကြီးချုပ် အန်ဝါက သူဟာ ဒုက္ခသည်တွေကို ပြန်ပို့ရေးကိစ္စ ဆွေးနွေး ညှိနှိုင်းဖို့အတွက် အာဏာသိမ်း စစ်ခေါင်းဆောင် ဘဝကနေ ကိုယ်တိုင်ခန့် သမ္မတ ရာထူး ရယူထားသူ မင်းအောင်လှိုင်ကို မလေးရှားဆီ ဖိတ်ခေါ်မယ်လို့ အတည်ပြုထားပါတယ်။
ကိုးကား – AFP
