မိန်းကလေး တစ်ယောက်ကို မဖွယ်မရာ ထိကိုင်ပြီး လိင်ပိုင်းဆိုင်ရာ နှောင့်ယှက်ခဲ့တဲ့ စက်ရုပ်နဲ့ အဲဒီစက်ရုပ်ရဲ့ ပိုင်ရှင်ကို ဂျာမနီ ရဲတပ်ဖွဲ့က ဖမ်းဆီး ထိန်းသိမ်းခဲ့ပါတယ်။
ပြီးခဲ့တဲ့ သီတင်းပတ်ကုန်က ဖြစ်စဉ်မှာ အနီနဲ့ရွှေရောင် ဆေးခြယ်ထားတဲ့ အဝေးထိန်း စနစ်သုံး စက်ရုပ်ဟာ အသက် ၁၆ နှစ်အရွယ် မိန်းကလေးရဲ့ တင်ပါးကို သွားကိုင်ခဲ့ပြီး နောက်ဖက်ကနေ မဖွယ်မရာ ပုံစံမျိုးတွေ လုပ်ပြခဲ့တယ်လို့ ကိုလုံးမြို့ ရဲတပ်ဖွဲ့က ပြောပါတယ်။ အဲဒါကြောင့် မိန်းကလေးက အလန့်တကြား အော်ဟစ်ပြီး စက်ရုပ်နဲ့ ဝေးရာကို ဖယ်ခွာသွားခဲ့ရပါတယ်။
အဲဒီ စက်ရုပ်ကို အသက် ၁၆ နှစ်အရွယ် လူငယ်တစ်ဦးက ပိုင်ဆိုင်ပြီး သူရော၊ အသက် ၁၉ နှစ်အရွယ် အဖော်တစ်ဦးကိုပါ ရဲတွေက ဖမ်းဆီးထားပါတယ်။ အဖော်ဖြစ်သူက ဖြစ်စဉ်ကို ဗီဒီယိုရိုက်ပြီး လူမှုကွန်ရက်ပေါ် ထုတ်လွှင့်နေခဲ့တာလို့ ယုံကြည်ရပါတယ်။
Facebookပေါ်မှာ ရဲတပ်ဖွဲ့ရဲ့ ထုတ်ပြန်ထားမှုအရ အောက်တိုဘာ ၁၀ ရက်နေ့တုန်းက ၄ ပေလောက် အမြင့်ရှိတဲ့ စက်ရုပ်ဟာ fast-food စားသောက်ဆိုင် တစ်ခုနားမှာ ရှိနေတဲ့ မိန်းကလေးကို နောက်ဖက်ကနေ ချဉ်းကပ်ပြီး တင်ပါးကို ဆုပ်ကိုင်ခဲ့သလို မဖွယ်မရာ ပုံစံတွေ လုပ်ပြခဲ့တာလို့ သိရပါတယ်။ စက်ရုပ်ဟာ အဝေးထိန်းစနစ် သက်သက်နဲ့ အလုပ်လုပ်တဲ့ အမျိုးအစား ဖြစ်တာကြောင့် ဒီကိစ္စရဲ့ နောက်ကွယ်မှာ ပိုင်ရှင်ရဲ့ ခိုင်းစေမှု ရှိနေတဲ့ သဘောပါပဲ။
Public Service Announcement
မိန်းကလေးရဲ့ တိုင်ကြားမှုကြောင့် ရဲတွေက စက်ရုပ်ကို လိုက်ရှာခဲ့ပြီး ဘလောက်တစ်ခုစာ အကွာလောက်မှာပဲ လူငယ်နှစ်ဦးကို ဖမ်းမိခဲ့တာ ဖြစ်ပါတယ်။ စက်ရုပ်ကိုလည်း ကားနောက်ခန်းထဲမှာ ရှာတွေ့ခဲ့ပါတယ်။
ရဲတပ်ဖွဲ့ ထုတ်ပြန်ထားတဲ့ ဓာတ်ပုံထဲမှာတော့ စက်ရုပ်မှာ နှုတ်ခမ်းမွေး အထူကြီး တပ်ဆင်ပေးထားပြီး ရွှေရောင် သံကြိုးကြီးတစ်ကွင်းကို လည်ပင်းမှာဆွဲပြီး အဖြူရောင် စွပ်ကျယ် ဝတ်ပေးထားတာ တွေ့ရပါတယ်။ ရဲတွေဟာ သံသယရှိသူ နှစ်ဦးဆီက မိုဘိုင်းဖုန်း နှစ်လုံးကိုလည်း သိမ်းယူထားပါတယ်။
ရဲတွေက အခုကိစ္စနဲ့ ပတ်သက်လို့ စုံစမ်းစစ်ဆေးမှုတွေ ပြုလုပ်နေဆဲလို့ ဆိုပါတယ်။ နောက်ပြီး ဖြစ်စဉ်နဲ့ ပတ်သက်လို့ ထင်ကြေး အမျိုးမျိုး ပေးနေကြရာမှာ တချို့သော လွန်ကဲတဲ့ မှတ်ချက်တွေဟာ စည်းလွတ်ဘောင်လွတ်ဖြစ်ပြီး ရာဇဝတ်မှု မြောက်သွားနိုင်ကြောင်း ရဲတပ်ဖွဲ့က နောက်ဆက်တွဲ ပို့စ်တစ်ခုနဲ့ သတိပေးထားပါတယ်။
ကိုးကား: BBC
