စဉ့်ကိုင်မှာ စစ်မှုထမ်းကြေးကောက်နေတဲ့ အုပ်ကြီးအပါအဝင် ၃ ဦး ပစ်ခတ်ခံရပြီး ၂ ဦး သေဆုံး

အောက်တိုဘာ-၂၆၊၂၀၂၆။ဟာနာဆန်/People’s Spring

မန္တလေးတိုင်း၊ ကျောက်ဆည်ခရိုင်၊ စဉ့်ကိုင်မြို့နယ်၊ နဘဲပင်ကျေးရွာမှာ စစ်မှုထမ်းကြေးကောက်ပေးနေတဲ့ အုပ်ချုပ်ရေးမှူးအပါအဝင် ၃ ဦး ပစ်ခတ်ခံရပြီး ၂ ဦး သေဆုံးကြောင်း နဂါးနီပြောက်ကျားတပ်ဖွဲ့-မြင်းခြံက သတင်းထုတ်ပြန်ပါတယ်။

​ပြီးခဲ့တဲ့ အောက်တိုဘာ ၂၃ ရက် မနက် ၇နာရီကျော်အချိန်ခန့်က စဉ့်ကိုင်မြို့နယ်၊ နဘဲပင်ကျေးရွာ ဘုန်းကြီးကျောင်းအနီးက ဆိုင်တစ်ဆိုင်မှာ စစ်မှုထမ်းကြေးကောက်ခံဖို့ စာရင်းပြုစုနေတဲ့ နဘဲပင်ရွာက စစ်တပ်ခန့် အုပ်ချုပ်ရေးမှူး ဆန်းဝင်း၊ဇော်လင်းအောင်နဲ့ ပေါက်ကိုယ်တော်တပည့်လုပ်ခဲ့ဖူးတဲ့ သူရိန် တို့ ၃ဦးကို ဝင်ရောက်ပစ်ခတ်ခဲ့ကြောင်း နဂါးနီပြောက်ကျားတပ်ဖွဲ့-မြင်းခြံရဲ့ တာဝန်ရှိသူက ပြောပါတယ်။

​အဆိုပါ ပစ်ခတ်မှုကြောင့် အုပ်ချုပ်ရေးမှူး ဆန်းဝင်းနဲ့ပေါက်ကိုယ်တော်ရဲ့ တပည့်ဖြစ်ဖူးသူ သူရိန်တို့ ၂ ဦးမှာ နေရာမှာတင် ပွဲချင်းပြီး သေဆုံးသွားခဲ့ပြီး ဇော်လင်းအောင် ဆိုသူမှာမူ ဒဏ်ရာရရှိခဲ့ကာ ဆေးရုံသို့ ပို့ဆောင်ထားရတယ်လို့ နဂါးနီပြောက်ကျားတပ်ဖွဲ့-မြင်းခြံရဲ့ တာဝန်ရှိသူက ပြောပါတယ်။

Public Service Announcement

“ဘာမှတော့မသိမ်းဆည်းခဲ့ရဘူး။ နယ်မြေကြပ်တော့လုပ်ရတာခက်ခဲတာနဲ့အမြန်ပြန်ထွက်ခဲ့တာပါ”လို့ အထက်ပါတာဝန်ရှိသူက ပြောပါတယ်။

ပစ်ခတ်မှုဖြစ်ပွားပြီးနောက် ၁ နာရီခန့်အကြာမှာ စစ်တပ်က ကား ၁စီးနဲ့ ရောက်လာပြီး စစ်ဆေးခဲ့ကြောင်း သိရပါတယ်။ အာဏာသိမ်းစစ်တပ်ဟာ အဲဒီပစ်ခတ်မှုနဲ့ပတ်သက်ပြီး ၎င်းတို့ မသင်္ကာတဲ့ အမျိုးသား ၁၀ ဦးခန့်ကိုလည်း ဖမ်း​ဆီးသွားကြောင်း ဒေသခံအချို့က ပြောပါတယ်။

အာဏာသိမ်းစစ်တပ်ဟာ လာမယ့်နိုဝင်ဘာမှာလုပ်မယ့် စစ်မှုထမ်းအပတ်စဥ်(၃၀)အတွက် စစ်မှုထမ်းဆင့် ခေါ်တာ၊ ပေါ်တာဆွဲတာတွေ အခုကတည်းက ပြုလုပ်နေတာဖြစ်ပြီး ရန်ကုန်၊ မန္တလေးအပါအဝင် ၎င်းတို့ထိန်းချုပ်ထားတဲ့ ​ဒေသ​တွေမှာ အခုလပိုင်းအတွင်း ပေါ်တာဆွဲတာ​တွေကို ဆက်တိုက်လုပ်နေတာဖြစ်ပါတယ်။