စစ်ကောင်စီတပ်မှ တိုက်လေယာဉ်ဖြင့် တိုက်ခိုက်၊ ပြည်သူ့ရဲဘော်အချို့ဒဏ်ရာရ
ကယား(ကရင်နီ)ပြည်နယ် လွိုင်ကော်မြို့ရှိ ဒေါဥခူရပ်ကွက်နှင့် မိုင်းလုံး ရပ်ကွက်တွင် ယနေ့ တိုက်ပွဲပြင်းထန်ခဲ့ပြီး စစ်ကောင်စီတပ်မှ သေဆုံးထိခိုက်မှုများပြားကာ သုံးဦးဖမ်းမိခဲ့ကြောင်း ဒီးမော့ဆိုမြို့နယ် ပြည်သူ့ကာကွယ်ရေး တပ်ဖွဲ့ (DMO-PDF)က ထုတ်ပြန်သည်။
ဒေါဥခူရပ်ကွက် အကျဥ်းထောင်ဘေးပတ်လည်တွင် ကင်းပုန်းဝပ်ချထားသောအကြမ်းဖက်စစ်ကောင်စီတပ်ဖွဲ့ကို DMO-PDF ၊ KDF၊ GZ 21 တပ်ဖွဲ့များ ပူးပေါင်း တိုက်ခိုက်ခဲ့ရာ တိုက်ပွဲမှာ ၄နာရီကျော် ကြာမြင့်ပြီး စစ်ကောင်စီတပ်မှငါးဦးခန့် သေဆုံးခဲ့သည်ဟု ဖော်ပြထားသည်။
မိုင်းလုံးရပ်ကွက်တွင်လည်း စစ်ကောင်စီတပ်ဖွဲ့ကို DMO-PDF၊ လွိုင်ကော် PDF၊ ကရင်နီ အမျိုးသား ကာကွယ်ရေးတပ်ဖွဲ့(KNDF)၊ ကရင်နီတပ်မတော်(KA)နှင့် အခြား တော်လှန်ရေးတပ်ဖွဲ့များ ပူးပေါင်းတိုက်ခိုက်ခဲ့ရာ နံနက်မှ ညပိုင်းအထိ တိုက်ပွဲ ပြင်းထန်ခဲ့သည်ဟု ဆိုသည်။
Public Service Announcement
တိုက်ပွဲတွင် လက်နက်တချို့သိမ်းဆည်းရမိသည့်အပြင် အကြမ်းဖက်စစ်ကောင်စီတပ်ဖွဲ့ဝင်သုံးဦးလည်း KNDFတပ်ဖွဲ့က အရှင်ဖမ်းဆီးရမိခဲ့ကြောင်း၊ စစ်ကောင်စီတပ်စခန်းခန်းချထားသောနေရာတွင် ပြည်သူပိုင်အိုး အိမ်နှစ်လုံး မီးလောင်ပျက်စီးခဲ့ကြောင်း ထုတ်ပြန်သည်။
အဆိုပါ တိုက်ပွဲတွင် အကြမ်းဖက်စစ်ကောင်စီတပ်ဖက်က အများအပြားသေဆုံးနိုင်ပြီး ထိခိုက်ဒဏ်ရာရသူ အမြောက်အများလည်းရှိခဲ့ကြောင်း၊ ညနေပိုင်းတွင် တိုက်လေယာဉ်ဖြင့် ဗုံးကြဲတိုက်ခိုက်ခဲ့ကြောင်း ဖော်ပြသည်။
လွိုင်ကော်မြို့တွင်း တိုက်ပွဲ ၂ရက်အတွင်း ဒီးမော့ဆို PDF တပ်ဖွဲ့မှ ရဲဘော်သုံးဦး ထိခိုက်ဒဏ်ရာရရှိခဲ့ကြောင်း ထုတ်ပြန်ခဲ့သည်။ အခြားတော်လှန်ရေးတပ်ဖွဲ့မှ ထိခိုက်ဒဏ်ရာရသူ ရှိမရှိ ဖော်ပြမထားပေ။
