နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို တရားစီရင်မှုသည် နိုင်ငံရေးအရ လှုံ့ဆော်မှုသာဖြစ်ပြီး တရားဥပဒေစိုးမိုးရေး ဖျက်ဆီးခြင်းကိုဦးတည်သော နောက်ထပ်ခြေလှမ်း ဖြစ်ကြောင်း ဥရောပသမဂ္ဂက ဇန်နဝါရီ ၁၁ ရက်တွင် ထုတ်ပြန်သည်။
မြန်မာစစ်ကောင်စီက နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို နောက်ထပ် ထောင်ဒဏ် ၄ နှစ် ချမှတ်လိုက်ခြင်းအပေါ် ဥရောပသမဂ္ဂက သဘောထားကြေညာချက်ထုတ်ပြန်လိုက်ခြင်းဖြစ်သည်။
စစ်ကောင်စီ၏ အဆိုပါတရားစီရင်မှုသည် မြန်မာနိုင်ငံတွင် ဗြောင်ကျစွာလူ့အခွင့်အရေးချိုး ဖောက်နေသည်ကို ထပ်မံမြင်သာစေပြီး ဖေဖော်ဝါရီ ၁ရက် အာဏာသိမ်းချိန်ကစ၍ ဒီမိုကရေစီအတွက် ကြီးမားသော ဆုတ်ယုတ်မှုလည်းဖြစ်ကြောင်း အီးယူက သုံးသပ်သည်။
အဆိုပါဖြစ်စဉ်များသည် အာဆီယံ၏ ဘုံဆုံးဖြတ်ချက် ၅ ရပ်က တောင်းဆိုသည့် အားလုံးပါဝင် သော တွေ့ဆုံဆွေးနွေးရေးဖြစ်စဉ်မှ ဒေါ်အောင်ဆန်းစုကြည်နှင့်အမျိုးသားဒီမိုကရေစီအဖွဲ့ချုပ်အပါအဝင် ဒီမိုကရေစီနည်းကျရွေးကောက်ခံခေါင်းဆောင်များကို ဖယ်ထုတ်ရန် ထင်ရှားသည့်ကြိုးပမ်းမှုဖြစ်ကြောင်းလည်း အီးယူက ဆိုသည်။
Public Service Announcement
ထို့အပြင် အာဏာသိမ်းချိန်ကစ၍ ဖမ်းဆီးထားသော နိုင်ငံရေးအကျဉ်းသားများနှင့် မတရားထိန်းသိမ်းခံရသူအားလုံးကို ခြွင်းချက်မရှိချက်ချင်းပြန်လွှတ်ပေးရန် အီးယူ၏အရေးပေါ် တောင်းဆိုချက်ကို ထပ်မံအတည်ပြုခဲ့သည်။
