Data နှုန်းထားများ အဆမတန်တိုးမြှင့် ကောက်ခံမှုကို တုန့်ပြန်သွားမည်ဟု မန္တလေး M.P.F အဖွဲ့ သတိပေး

Telecom ကုမ္ပဏီများက အာဏာသိမ်းစစ်ကောင်စီအလိုကျ Data နှုန်းထားများကို အဆမတန်တိုးမြှင့် ကောက်ခံ နေကြောင်း တိုင်ကြားမှုများရှိ၍ မဟာမိတ်အဖွဲ့များနှင့်ပူးပေါင်းပြီး တုန့်ပြန်မည်ဟု Mandalay Phoenix Force – M.P.F အဖွဲ့က သတိပေးလိုက်သည်။

ပြည်သူအများစုက Wifi ကို အားထားအသုံးပြုနေချိန်တွင် အာဏာသိမ်းစစ်ကောင်စီက Data နှုန်းထားများ တိုးမြှင့်ကောက်ခံရန် ညွန်ကြား၍ Telecom ကုမ္ပဏီများက တိုးမြှင့်ကောက်ခံနေသည်ဟု ပြည်သူများက တိုင်ကြား လာကြောင်း ယင်းအဖွဲက ဖော်ပြထားသည်။

“နိုင်ငံရေးအခြေအနေကြောင့် ပြည်သူအများ စိတ်ရောလူပါ ဒုက္ခရောက်နေချိန် Wifiနှုန်းထားများ အဆမတန် တိုးမြှင့်ကောက်ခံ နေသော Wifiကုမ္ပဏီများအား မဟာမိတ်များနှင့်ပူးပေါင်း၍ ထိထိရောက်ရောက် တုန့်ပြန်သွားမည်” ဟု M.F.P က သတိပေးထားသည်။

ထို့အပြင် ပြည်သူများအနေဖြင့်လည်း Data ဈေးနှုန်းများမြှင့်၍ ကောက်ခံခြင်းကို အထောက်အထားခိုင်လုံစွာဖြင့် တိုင်ကြားနိုင်ကြောင်းလည်း ၎င်းတို့အဖွဲ့က ဆိုသည်။

Public Service Announcement

စစ်တပ်က အာဏာသိမ်းပြီးနောက်ပိုင်းတွင် ၎င်းတို့၏ ထောက်တိုင်တစ်ခုဖြစ်သော Mytel တာဝါတိုင်များကို ပြည်သူ့ကာကွယ်ရေးတပ်များက ဖျက်ဆီးမှုပြုလုပ်၍ သတိပေးနေသည်။