မန္တလေးတိုင်း၊ သပိတ်ကျင်းမြို့နယ်တွင် အာဏာသိမ်းစစ်ကောင်စီကိုဆက်ကြေးပေးလုပ်ကိုင်နေသော တရားမဝင်လောင်းကစားဝိုင်းများ ရပ်တန်းကရပ်ရန် သပိတ်ကျင်းမြို့နယ် ပြည်သူ့ကာကွယ်ရေးတပ်မတော်ကသတိပေးလိုက်သည်။
သပိတ်ကျင်းမြို့နယ်အတွင်း စစ်ကောင်စီအား ဆက်ကြေးပေးကာ တရားမဝင်အလောင်းအစားများကို ပြုလုပ်နေသည်ကို တွေ့ရှိရကြောင်း၊ တရားမဝင်လောင်းကစားများအား သပိတ်ကျင်းမြို့နယ် ပြည်သူ့ကာကွယ်ရေးတပ်မတော်က ပြင်းပြင်းထန်ထန် ရှုံ့ချကန့်ကွတ်ပြီး ရပ်တန်းကရပ်ရန် သတိပေးကြောင်း ယနေ့ဇန်နဝါရီလ ၂၇ ရက်နေ့တွင် ထုတ်ပြန်ကြေညာသည်။
“ရွာသားတွေလည်း အတော်ပျက်စီးနေပြီး ရွာပျက်တော့မှာစိုးရိမ်နေရပါတယ်။ စနစ်ကိုတိုက်ချင်ရင် လည်ပတ်နေတဲ့ ယန္တရားကို ဖြိုနိုင်ရပါမယ်။ ဒီနည်းလမ်းက အသက်တွေဘဝတွေ ပေးနေစရာမလိုပါဘူး။ အကြမ်းဖက်အာဏာသိမ်းစစ်ကောင်စီဆီ စီးဆင်းနေတဲ့ တရားမဝင်ငွေကြေးကို ဖြတ်တောက်နိုင်ရင် ပွဲပြတ်ပါပြီ။”ဟု သပိတ်ကျင်းမြို့နယ် ပြည်သူ့ကာကွယ်ရေးတပ်မတော်က ပြောသည်။
သပိတ်ကျင်းမြို့နယ်၊ တွင်းငယ်ရွာ၊ ရှားတောရွာ၊ ပေါက်တပင်ရွာ၊ ကြာညှပ်ရွာ၊ တကောင်းရွာ၊ ရေရှင်ရွာ၊ ဇရပ်ကွင်းရွာ အစရှိသည့်ကျေးရွာများတွင် စစ်ကောင်စီနှင့် ရဲတပ်သားများကို လိုင်းကြေးပေးကာ ကြက်ဝိုင်းများပြုလုပ်နေကြောင်း သပိတ်ကျင်းအခြေစိုက်Thabeikkyin Revolution -TR အဖွဲ့မှအသိပေးသည်။
Public Service Announcement
သပိတ်ကျင်းမြို့နယ် ၊ ဇရပ်ကွင်းကျေးရွာတွင် စစ်ကောင်စီနဲ့ ရဲတပ်သားများကို လိုင်းကြေးပေးကာ ကြက်ဝိုင်းများအား ပြုလုပ်နေကြောင်း၊ ဇရပ်ကွင်းကျေးရွာ အမှတ် (၁)ရပ်ကွက်အတွင်း ခြံဝိုင်းအတွင်းတွင် ကြက်ဝိုင်းများအား တစ်လလျှင် ၅သိန်း မှ ၁၀သိန်းကြား လိုင်းကြေးများအား စစ်ကောင်စီနဲ့ ရဲများအား ပေးဆောင်ကာ တစ်ပတ်လျှင် ၃ရက် အမြဲစည်ကားစွာ ပြုလုပ်လျက်ရှိပြီး ကြက်ဝိုင်းတွင် လာသော လူဦးရေမှာ ၅၀ နှင့် ၁၀၀ ကြားရှိကြောင်း၊ ခြံဝိုင်းထဲတွင် ကြက်ဝိုင်း ၃ဝိုင်းအထိ အပြိုင်အဆိုင် ရှိနေပြီး လက်ပံပြန့်၊ ရေထွက် ၊လိပ်ကျ ၊ဇရပ်ကွင်း မှ လူများ အများဆုံး လာကြသည်ဟု ဒေသခံများ၏စကားကို ကိုးကားကာTRက အသိပေးသည်။
သပိတ်ကျင်းမြို့နယ်အတွင်း အကြမ်းဖက်စစ်ကောင်စီအားခုခံတိုက်ခိုက်တော့မည်ဖြစ်၍ မန္တလေး-မိုးကုတ်လမ်းနှင့် မန္တလေး-ဗန်းမော်လမ်း သပိတ်ကျင်းလမ်းပိုင်းတွင် ည ၇ နာရီမှ နံနက် ၆ နာရီအထိ သွားလာခြင်းမပြုရန် သပိတ်ကျင်းမြို့နယ် ပြည်သူ့ကာကွယ်ရေးတပ်မတော်က သတိပေးထားသည်။
