ကရင်နီပြည်၌ စစ်တပ်၏ကျူးလွန်မှုများအပါအဝင် မြန်မာ့အရေးဆိုးရွားလာမှု ပြင်သစ်စိုးရိမ်

ကရင်နီပြည်နယ်၌ စစ်တပ်၏ကျူးလွန်မှုများအပါအဝင် မြန်မာ့အရေးဆိုးရွားသည့်အခြေအနေကို လွန်စွာစိုးရိမ်ကြောင်း ပြင်သစ်နိုင်ငံခြားရေးဝန်ကြီး Jean-Yves Le Drian က ပြောသည်။

ပြင်သစ်နိုင်ငံခြားရေးဝန်ကြီးသည် အာဆီယံ၏ မြန်မာနိုင်ငံဆိုင်ရာအထူးကိုယ်စားလှယ်၊ ကမ္ဘော ဒီးယားနိုင်ငံခြားရေးဝန်ကြီးနှင့် ဇန်နဝါရီ ၂၈ ရက်တွင် ဆက်သွယ်ကာ မြန်မာ့အရေးဆွေးနွေးခဲ့ ပြီး အကျပ်အတည်းဖြေရှင်းရေး အာဆီယံ၏လုပ်ဆောင်မှုများကို ပြင်သစ်၏ အားပေးကူညီမှုကို ထပ်လောင်းပြောကြားသည်။

အားလုံးပါဝင်သည့် နိုင်ငံရေးတွေ့ဆုံဆွေးနွေးရေး စတင်အကောင်အထည်ဖော်ခြင်းအပါအဝင် အာဆီယံ၏ဘုံဆုံးဖြတ်ချက် ၅ ရပ် အကောင်အထည်ဖော်ရန်လိုအပ်မှုကို ပြင်သစ်နိုင်ငံခြားရေးဝန်ကြီးက အလေးပေးဆွေးနွေးသည်။

ဆေးဝါးဆိုင်ရာပစ္စည်းများပေးပို့ရာတွင် မြန်မာစစ်ကောင်စီက အတားအဆီးများထပ်မံလုပ်ဆောင်နေချိန်တွင် ဘေးကင်းလုံခြုံရေးလိုအပ်ချက်နှင့် လူသားချင်းစာနာမှုအကူအညီကို ချက်ချင်းပေးရေးတို့ကို ပြင်သစ်နိုင်ငံခြားရေးဝန်ကြီးက တောင်းဆိုသည်။

Public Service Announcement

ထို့အပြင် ပြင်သစ်သည် အာဆီယံအထူးကိုယ်စားလှယ်နှင့် ကုလသမဂ္ဂအတွင်းရေးချုပ်၏ အထူးကိုယ်စားလှယ်တို့၏ မြန်မာ့အရေးဖြေရှင်းရေးလုပ်ဆောင်မှုများကို အပြည့်အ၀ထောက်ခံကြောင်း ထပ်လောင်းအတည်ပြုသည်။