●ဂျီသရီးငါးလက်နှင့်ကျည် အများအပြားသိမ်းဆည်းရမိ
မကွေးတိုင်း မြိုင်မြို့နယ်ရှိ လင်းကတောနယ်မြေရဲစခန်းကို ပြည်သူ့ကာကွယ် ရေးပူးပေါင်းတပ်များ ဝင်ရောက် တိုက်ခိုက်သိမ်းပိုက်ခဲ့ပြီး လက်နက်၊ဗုံးသီးနှင့် ကျည်အများအပြား သိမ်းဆည်းရမိခဲ့ကြောင်း မြိုင်မြို့နယ် PDFမှ ဗိုလ်Cross က လူထုနွေဦးသို့ ပြောကြားသည်။
ယနေ့ (ဇန်နဝါရီ ၂၉ ရက်)နေ့လယ်က လင်းကတောနယ်မြေရဲစခန်းကို သိမ်းဆည်းနိုင်ခဲ့ပြီးနောက် စခန်းတစ်ခုလုံးကို မီးရှို့ဖျက်ဆီးခဲ့သည်ဟုသည်။
“ရဲစခန်းထဲမှာ သွေးကွက်တွေအများကြီးတွေ့ရတယ်။သိမ်းနိုင်တာတော့G3 ငါးလက်၊ကျည် ၄၀၀ ၊အူဇီ ၃ လက်၊ ကျည် ၂၀၀၊ခြောက်လုံးပြူ တစ်လက်၊ဗုံးသီး ခုနှစ်လုံး၊လက်တော့ နှစ်လုံး၊ပရင့်တာ တစ်လုံး၊ဆိုင်ကယ် လေးစီး၊ အခြားဘက်သုံးပစ္စည်းတွေ ရရှိခဲ့ပါတယ်”ဟု ဗိုလ် Crossက ပြောသည်။
Public Service Announcement
ယနေ့ တိုက်ခိုက်မှုကို မြိုင်မြို့နယ် PDF၊ စလင်စကြီး PDFနှင့် ရေစကြိုမြို့နယ် PDF တို့ ပူးပေါင်းတိုက်ခိုက်ခဲ့ပြီး ထိခိုက်ဒဏ်ရာရရှိသူတစ်စုံတစ်ဦးမှမရှိခဲ့ဟု ဆိုသည်။
ဇန်နဝါရီ ၂၂ ရက်က စစ်ကိုင်းတိုင်း ဖောင်းပြင်မြို့နယ်ရှိ ရဲစခန်းနှစ်ခုကို ဝင်ရောက်စီးနင်းနိုင်ခဲ့ပြီး စခန်မှူး အပါအဝင်ရဲတပ်သား ရှစ်ဦးကိုဖမ်းဆီးရမိကာ လက်နက် ၁၁လက်နှင့် ဆက်စပ်ပစ္စည်းများ သိမ်းဆည်းရမိခဲ့သည်။
၂၀၂၁အတွင်းကလည်း မကွေးတိုင်း ရေစကြို မြို့နယ်ရှိ ပခန်းငယ်စခန်း နှင့် မအူရဲစခန်းတို့ကို ပြည်သူ့ကာကွယ်ရေးတပ်ဖွဲ့က ဝင်ရောက်စီးနင်းနိုင်ခဲ့သည်။
