ချင်းပြည်နယ် ထန်တလန်မြို့၌ မြို့တွင်းတိုက်ပွဲဖြစ်ပွားပြီး အကြမ်းဖက်စစ်ကောင်စီတပ်မှ ငါးဦးသေဆုံးကြောင်း CDF(ထန်တလန်)က ထုတ်ပြန်သည်။
ထိုတိုက်ပွဲကို CDF(ထန်တလန်)နှင့် ချင်းအမျိုးသားတပ်(CNA)တို့မှ ရဲဘော်များနှင့် အကြမ်းဖက်စစ်ကောင်စီတပ်တို့ကြား ဖြစ်ပွားခဲ့ခြင်းဖြစ်ပြီး အကြမ်းဖက်စစ်ကောင်စီတပ်မှ ဒဏ်ရာရရှိသူတစ်ဦးလည်းရှိသည်ဟု လည်း ဆိုသည်။
တိုက်ပွဲတွင် စစ်ကောင်စီတပ်ဖက်မှ လက်နက်ကြီးများဖြင့် အဆက်မပျက် စတင်ပစ်ခတ်မှုမှစတင်ခဲ့ပြီး ဒရုန်းဖြင့် ဗုံးကြဲတိုက်ခိုက်ခဲ့သည်ဟုလည်း CDF(ထန်တလန်)က ဆိုသည်။
အကြမ်းဖက်စစ်ကောင်စီတပ်များက လက်နက်ကြီး၊ လက်နက်ငယ်များဖြင့် ရမ်းသမ်းပစ်ခဲ့ပြီး ထန်တလန်မြို့ပေါ်ရှိ လူနေအိမ်အချို့ မီးလောင်ပျက်စီးခဲ့သည်ဟု ထုတ်ပြန်သည်။
Public Service Announcement
“အိမ်တွေမီးလောင်တာတော့ ဟုတ်ပါတယ်။ ဘယ်နှစ် အိမ်လောင်လဲတော့ မသိရသေးဘူး”ဟု ဒေသခံတစ်ဦးက ပြောသည်။
အကြမ်းဖက်စစ်ကောင်စီက ထန်တလန်မြို့ကို ၂၀၂၁ စက်တင်ဘာမှ ဒီဇင်ဘာအထိ မီးရှို့ဖျက်ဆီးခဲ့မှု ၁၂ကြိမ်ပြုလုပ်ခဲ့ပြီး အိမ်ခြေ ၆၉၀နှင့် ဘုရားကျောင်း ၈ကျောင်း မီးလောင်ပြာကျခဲ့ရသည်ဟု ရွှေ့ပြောင်းသူများအကူ အညီပေးရေးအဖွဲ့တစ်ခုဖြစ်သည့် ထန်တလန်နေရာချထားရေးကော်မတီ (Thantlang Placement Affairs Committee) က ထုတ်ပြန်ထားသည်။
ပြီးခဲ့သည့် ဇန်နဝါရီကလည်း မီးရှို့မှုအကြိမ်ကြိမ်ပြုလုပ်ထားသည်။
