စစ်ကိုင်းတွင် မြင်းမူဘက်မှလာသော စစ်ဘေးရှောင်ပြည်သူ ၂၄၀ ခန့်ရှိ၊ အကူအညီများလိုအပ်နေ

စစ်ကိုင်းမြို့နယ်အတွင်းသို့ မြင်းမူဘက်မှရောက်ရှိလာသည့် စစ်ဘေးရှောင်ပြည်သူ ၂၄၀ ဦးခန့်ရှိနေကြောင်း ပြည်သူ့ကာကွယ်ရေးတပ်ဖွဲ့ (PDF)လက်အောက်ခံ Sagaing District Medical Team(SDMF)က ယနေ့ (ဖေဖော်ဝါရီ ၅) ထုတ်​ပြန်သည်။

စစ်ဘေးရှောင်ပြည်သူများတွင် အမျိုးသား ၁၀၀ ဦးနှင့် အမျိုးသမီး ၁၃၆ ဦးရှိပြီး စစ်ကိုင်းမြို့နယ် ပြည်သူ့အုပ်ချုပ်ရေးအဖွဲ့နှင့်အတူ လူသားချင်းစာနာထောက်ထားမှုဆိုင်ရာအကူ အညီများပေးနေကြောင်း ထုတ်ပြန်ချက်တွင် ဖော်ပြသည်။

“လိုအပ်ချက်ကတော့အများကြီးပါ။ လူလွတ် ထွက်ပြေးလာကြတာဆိုတော့ တစ်ကိုယ်ရည်သုံးပစ္စည်းတွေ၊ စောင်တွေနဲ့ မိုးကာတွေ အထူးလိုအပ်ပါတယ်”ဟု SDMT မှ ဆေးတပ်သားတစ်ဦးက လူထုနွေဦးသို့ ပြောသည်။

လက်ရှိအခြေအနေတွင် စစ်ဘေးရှောင်ပြည်သူများအား အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေး အန္တရာယ် စီမံခန့်ခွဲရေးဝန်ကြီးဌာန၊ မြို့နယ်ပြည်သူ့အုပ်ချုပ်ရေးအဖွဲ့နှင့် ဒေသခံပြည်သူများက အစားအသောက်နှင့် ဆေးဝါးများအပါအဝင် အသုံးအဆောင်ပစ္စည်းကူညီထောက်ပံထားကြောင်း ၎င်းက ဆက်ပြောသည်။

Public Service Announcement

သို့သော် ရှောင်းတိမ်းနေထိုင်ကြရသည့်ရက်ရှည်လာသည်နှင့်အမျှ လိုအပ်ချက်များ ယခုထက်ပိုမိုရှိလာမည်ဖြစ်သောကြောင့် ပြည်သူမှ ပြည်သူသို့ အကူအညီပေးကြရန် SDMT ကမေတ္တာရပ်ခံထားသည်။