အကြမ်းဖက်စစ်ကောင်စီက လေကြောင်းမှ ပြည်သူများနေထိုင်သော ကျေးရွာ နှင့်စစ်ဘေးရှောင်စခန်းများကိုပါ ပစ်ခတ်တိုက်ခိုက်လာသောကြောင့် ကရင်ပြည်နယ်တွင် လေကြောင်းတိုက်ခိုက်မှုများ ပြုလုပ်လာပါက ပြည်သူများ ကာကွယ်နိုင်ရေးအတွက် ကရင်ဘာသာဖြင့်ရေးသားထားသော ပညာပေးဗီနိုင်းများကို အမျိုးသားညီညွတ်ရေးအစိုးရ(NUG)၏ ဝန်ကြီး နော်ဆူဆန်နာလှလှစိုးက ဖြန့်ဝေပေးနေသည်။
ကမ္ဘာ့ကျန်းမာရေးအဖွဲ့- WHO၏ လမ်းညွှန်ချက်ကို စကောကရင်ဘာသာသို့ ဘာသာပြန်၍ ကရင်ပြည်နယ်ရှိ ပြည်သူများစာသင်ကျောင်းများနှင့် ဆေးရုံများသို့ ဖြန့်ဝေပေးထားသည်ဟု NUG၏ အမျိုးသမီး၊လူငယ်နှင့် ကလေးသူငယ်ရေးရာဝန်ကြီး နော်ဆူဆန်နာလှလှစိုးက သူ၏ ဖေ့စ်ဘွတ်ခ်တွင်ရေးသား၍ သတင်းထုတ်ပြန်သည်။ ထိုသို့ဖြန်ဝေရာတွင် ကုန်ကျစာရိတ်များကို Free Burma Ranger အဖွဲ့က ကူညီလှူဒါန်းသဖြင့် ကျေးဇူးတင်ရှိကြောင်းလည်း ဝန်ကြီးကရေးသားထားသည်။
လတ်တလောတွင် ကရင်ပြည်နယ်သို့ ဖြန့်ဝေနေပြီး အခြားစစ်ဘေးသင့်ဒေသများသို့လည်း သက်ဆိုင်ရာဘာသာစကားများသို့ ဘာသာပြန်ပြီး ထပ်မံပို့ပေးသွားမည်ဟုလည်း သိရသည်။
“လူ့ယဥ်ကျေး ၂၁ ရာစုခေတ်မှာ အခုလိုလေကြာင်းရန်သတိပေး၊ပညာပေးတွေထုတ်ဝေနေရတာ တကယ်စိတ်မကောင်းစရာပါပဲ” ဟု နော်ဆူဆန်နာလှလှစိုးက ပြောကြားထားသည်။
Public Service Announcement
ကမ္ဘာကျန်းမာရေးအဖွဲ့က အင်္ဂလိပ်ဘာသာဖြင့်ရေးသားထားသော လေကြောင်းတိုက်ခိုက်မှု အန္တရာယ်ကြိုတင်ကာကွယ်ရေး အကြံပြုချက်ကို People’s Spring (လူထုနွေဦး)သတင်းဌာနက မြန်မာဘာသာသို့ပြန်ဆိုကာ စာဖတ်သူများလွယ်ကူစွာနားလည်ပြီးဖတ်ချင်စဖွယ်ဖြစ်အောင် အင်ဖိုဂရပ်ဖစ် ဖြင့်ဖော်ပြခဲ့သည်။ ယခုအခါ တိုင်းရင်းသား ပြည်သူများအတွက် လေကြောင်းအန္တရာယ်ကာကွယ်ရေး ပညာပေး အစီအစဥ်တွင်အသုံးပြုလာနိုင်သဖြင့် ထိုအစီအစဥ်တွင်တစ်ထောင့်တစ်နေရာမှ ကူညီခွင့်ရခဲ့၍ People’s Spring သတင်းဌာနဝိုင်းတော်သားများကလည်းကျေနပ် ဂုဏ်ယူရပါသည်။
ယခုနောက်ပိုင်းတွင် အကြမ်းဖက်စစ်ကောင်စီသည် ပြည်သူ့ကာကွယ်ရေးအဖွဲ့များနှင့် တိုင်းရင်းသူလက်နက်ကိုင်အဖွဲ့များအားကောင်းသည့် ဒေသများ၌ မြေပြင်တိုက်ပွဲများတွင်မရှုမလှ အရေးနိမ့်နေအထိနာလာသဖြင့် လူထုနေထိုင်ရာ မြို့၊ရပ်ကွက်နှင့် ကျေးရွာများကို လေကြောင်းမှ တိုက်ခိုက်မှုများဆက်တိုက်ပြုလုပ်လာသည်။
