ဂန့်​​ဂေါတွင် စစ်​ကောင်စီနှင့်အကျိုးတူ ကုမ္ပဏီနှစ်ခုကို ပြည်သူ့ကာကွယ်​ရေးတပ်က ချိတ်ပိတ်ပြီး​နောက် ကျန်ကုမ္ပဏီ​နှစ်ခုလည်း လုပ်ငန်းရုပ်သိမ်းရပ်နား

အကြမ်းဖက်စစ်ကောင်စီနှင့် အကျိုးတူပူးပေါင်းလုပ်ကိုင်နေသော ဆောက်လုပ်ရေးကုမ္ပဏီများကို သုံးရက်အတွင်း လုပ်ငန်းရပ်ဆိုင်းရန် သတိပေးပြီးနောက် လိုက်နာမှုရှိခဲ့ကြောင်း ဂန့်ဂေါမြို့ပြည်သူ့ကာကွယ်ရေးတပ်ဖွဲ့ဝင်တစ်ဦးက People’s Springသို့ ပြောသည်။

ဂန့်ဂေါမြို့ စိုင်ဒူး GTC ဝင်းအတွင်း စစ်ကောင်စီနှင့် ပူးပေါင်း လုပ်ကိုင်ခွင့်ရနေသည့် ဆောက်လုပ်ရေး တာဝန်ယူနေသော ကုမ္ပဏီ လေးခုရှိပြီး ယောဘရားသားကုမ္ပဏီ (ဦးလွင်ဦး)နှင့် မြစ်သာဂန့်ဂေါကုမ္ပဏီ (ဦးစောလွင်)တို့အား ပြည်သူ့ကာကွယ်ရေးမြေပြင်ပူးပေါင်းအဖွဲ့များမှ ဖေဖော်ဝါရီ ၁၆ ရက်တွင် လုပ်ငန်းရပ်ဆိုင်း ချိတ်ပိတ်ခဲ့သည်။

ထို့နောက် ကျန်ရှိနေသည့် ဟိုပန်မန္တလာကုမ္ပဏီနှင့် ဇွဲရဲရင့် ကုမ္ပဏီတို့အနေဖြင့် သုံးရက်အတွင်းလုပ်ငန်းများရုပ်သိမ်းပြီး အမြန်ဆုံးထွက်သွားရန် သတိပေးခဲ့သည်။

“ဆောက်လုပ်ရေး ကုမ္ပဏီ ၄ခုလုံး ရုပ်သိမ်းထွက်ခွာသွားပါပြီ။ဆောက်လုပ်ရေးပစ္စည်း အပ်တိုတစ်ချောင်းမှ မကျန်အောင် ၁၂ ဘီးကား ၄စီးနဲ့သယ်သွားပါတယ်”ဟု အထက်ပါ တာဝန်ရှိသူက ရှင်းပြသည်။

Public Service Announcement

ထို့ကြောင့် မြေပြင်ပြည်သူ့တပ်ဖွဲ့ဝင်များ၏ သတိ ပေးချက်ကို အလေးနက်ထား လိုက်နာပေးသည့် ကုမ္ပဏီ ​လေးခုကို ကျေးဇူးအထူးတင်ရှိသည်ဟုလည်း ၎င်းက ဆိုသည်။

အလားတူ ဂန့်ဂေါမြို့နယ်အတွင်း အကြမ်းဖက်စစ်ကောင်စီထုတ်ကုန်နှင့် ၎င်းနှင့်ဆက်နွယ်သည့် ကုမ္ပဏီများမှ ထုတ်ကုန်ပစ္စည်းများ ရောင်းဝယ်၊ဖောက်ကားသယ်ဆောင်ခြင်းမပြုရန် ဂန့်ဂေါမြို့နယ်ပြည်သူ့အုပ်ချုပ်ရေးအဖွဲ့က ဖေဖော်ဝါရီ ၁၇ ရက်တွင် သတိပေးထုတ်ပြနထားသည်။