ကရင်နီပြည်နယ် လွိုင်ကော်မြို့နယ် လင်ဖုံလေးလမ်းခွဲအနီးရှိ တောင်ကုန်းတွင်တပ်စွဲကာ မြို့အဝင်၊အထွက်ကို ထိန်းချုပ်ရန် ကြိုးစားနေသော အကြမ်းဖက်စစ်ကောင်စီတပ်ကို ပြောက်ကျားဖြင့် ပစ်ခတ်တိုက်ခိုက်ခဲ့သည်ဟု လွိုင်ကော် PDFက ယနေ့ (ဖေဖော်ဝါရီ ၂၀)တွင် ထုတ်ပြန်သည်။
တိုက်ပွဲ ဖြစ်စဥ်မှာ ဖေဖော်ဝါရီ ၁၉ရက် နေ့ခင်းပိုင်းအချိန်တွင် ပစ်ခတ်ခြင်းဖြစ်ပြီး အကြမ်းဖက်စစ်ကောင်စီတပ်ဘက်မှ အသေအဆုံးများရှိသည်ဟု ဆိုသည်။
သေဆုံးသွားသော အကြမ်းဖက်စစ်ကောင်စီအဖွဲ့ဝင်များ၏ ခန္ဓာကိုယ်အား ပြန်ဆွဲထုတ်သွားသည်ကို မြင်တွေ့ရပြီး လက်နက်ကြီး၊လက်နက်ငယ်များဖြင့် ပြန်လည်ပစ်ခတ်ခဲ့ကြောင်း မြေပြင်ရဲဘော်က မျက်မြင်အတည်ပြုသည်။
တိုက်ပွဲတွင် လွိုင်ကော် PDFမှ ကျဆုံးမှုမရှိခဲ့ဘဲ အခြား မဟာမိတ်တပ်ဖွဲ့များမှ ဒဏ်ရာရရှိမှု အနည်းငယ်ရှိပြီး အသေးစိတ်ကို ၎င်းတို့ သက်ဆိုင်ရာ သတင်းဌာနများမှ ထုတ်ပြန်မည်ဟုလည်း အသိပေးသည်။
Public Service Announcement
“မိုးဗြဲ မှာ စစ်မျက်နှာစာ ဖွင့်တယ်။လွိုင်ကော်ကိုလည်း စစ်ခွေးတပ်ဘက်က ထိန်းချုပ်ဖို့ ကြိုးစား နေတာ။မနေ့က ည ကဆို နံနတ်တောတဝိုက်မှာ အင်အား၁၅၀ လောက်နဲ့ အကြမ်းဖက်စစ်တပ်က လှုပ်ရှားတာတွေလုပ်တယ်။ပြီးတော့ မြို့တွင်းလမ်းတချို့မှာ ကင်းပုန်းတွေထပ်တိုးထားတာကို ကျွန်တော်တို့ သိတယ်”ဟု ကရင်နီအမျိုးသားများကာကွယ်ရေးတပ်ဖွဲ့ (KNDF)တာဝန်ရှိသူတစ်ဦးက ရှင်းပြသည်။
လက်ရှိတွင် အကြမ်းဖက်စစ်ကောင်စီသည် ရှမ်း-ကယား (ကရင်နီ)နယ်စပ် အနီးတဝိုက်တွင် စစ်ကောင်စီတပ်က လေကြောင်း နှင့် ရေကြောင်းများမှတစ်ဆင့် အင်အားဖြည့်တင်းစေလွတ်နေပြီး မောင်းသူမဲ့ ဒရုန်းများဖြင့်ပါ အသုံးပြုရန် စီစဥ်နေသည်ဟုလည်း ဒေသခံသတင်းရင်းမြစ်များက ထုတ်ပြန်ထားသည်။
