ကလေးမြို့အနီး ချင်းတောင်ခြေတွင် အရပ်သားများ ခိုလှုံနေသည့် စစ်ဘေးရှောင်တဲ့စခန်းကို PDF စခန်းဟု စစ်ကောင်စီက စွပ်စွဲကာ လက်နက်ကြီးများဖြင့်ပစ်ခတ် ဖျက်ဆီးလိုက်၍ အရပ်သားများ ထပ်မံထွက်ပြေးနေရသည်။
ကလေးမြို့ သံဖိုရွာမှ အရပ်သားများသည် အကြမ်းဖက်စစ်ကောင်စီတပ်ဖွဲ့ဝင်များ၏ရန်ကိုကြောက်၍ ရွာအနီးရှိ ချင်းတောင်ခြေတွင် ယာယီတဲများထိုး၍ ပုန်းရှောင်နေသည်ကို စစ်ကောင်စီက လိုက်လံတိုက်ခိုက်ခဲ့ခြင်းဖြစ်သည်။
“စစ်ဘေးရှောင်စခန်းကို PDFစခန်းဆိုပြီး လက်နက်ကြီးတွေနဲ့ ပစ်ခတ်ပြီး သိမ်းယူသွားတာ။လက်နက်ကြီးထိလို့ စစ်ဘေးရှောင်တစ်ဦးဒဏ်ရာအပြင်းအထန်ရရှိသွားပါတယ်။
ချောင်းခွရွာက အမျိုးသမီး သုံး ယောက်မီးရှို့သတ်ခံရတာလည်း အဲဘက် သွားရင်း ဖမ်းပြီး သတ်သွားကြတာ” ဟု ကလေးမြို့ခံတစ်ဦးကပြောသည်။
စစ်ဘေးရှောင်စခန်းကို စစ်ကောင်စီက ဖေဖော်ဝါရီ ၂၄ရက်တွင် လက်နက်ကြီးဖြင့် ပစ်ခတ်တိုက်ခိုက်ပြီး ဖျက်ဆီးခဲ့ခြင်းဖြစ်သည်။ ယင်းနေ့မတိုင်ခင် ဖေဖော်ဝါရီ ၂၂ရက်က ချောင်းခွရွာမှ သားအမိသုံးဦးသည် စစ်ဘေးရှောင်စခန်းသို့သွားရောက်စဉ် စစ်ကောင်စီက လမ်းခုလတ်၌ ဖမ်းဆီးပြီး မီးရှို့သတ်ဖြတ်သွားသည်ဟု ဒေသခံများကပြောသည်။
Public Service Announcement
ကလေးမြို့နယ် ၊ချောင်းခွကျေးရွာမှ မိခင်ဖြစ်သူဒေါ်ငွန်ဇာလျန်(၄၀)နှစ်၊ သမီးဖြစ်သူ မချန်းနွန်ကြွန်း ( ၁၆နှစ်)သမီးငယ် မငွန်ဇာချန်း ( ၁၄နှစ်)တို့ကို စစ်ကောင်စီက ဖေဖော်ဝါရီ ၂၂တွင် ဖမ်းဆီးသွားပြီး မီးရှို့ထားသည့် ရုပ်အလောင်းများကို ဖေဖော်ဝါရီ ၂၄ရက်တွင်ဒေသခံများက ပြန်ရှာတွေ့ခဲ့ခြင်းဖြစ်သည်။
သံဖိုရွာသည် အိမ်ခြေလေးရာခန့်ရှိသည့်ရွာဖြစ်ပြီး ဒေသခံများသည် တောထဲတောင်ထဲတွင် ပင်ပန်းဆင်းရဲစွာ စစ်ဘေးရှောင်နေရသည်ဟု ဘဝတူစစ်ဘေးရှောင်ပြည်သူများက လူထုနွေဦးသို့ပြောသည်။
“ကျမတို့ကလေး နယ်က ရွာတွေ သူ့ရွာဟာ ကိုယ်မကယ်နိုင်၊ ကိုယ့်ရွာ သူမကယ်နိုင်တော့တဲ့ ဘဝတွေဖြစ်နေပြီ။ ကိုယ့်ရွာကို စစ်ခွေးတွေမလာရင် အေးချမ်းသလိုနေနေရတယ်။ လာတယ်ကြားရင်ပြေးကြရပြီ။ အဲလို ဖြစ်နေတော့တာ” ဟု ကလေးမြို့နယ်မှ စစ်ဘေးရှောင်ပြည်သးတစ်ဦးကပြောသည်။
