ဒီး​မော့ဆိုရှိ လိုဘာခိုရွာကို စစ်​ကောက်စီတပ် ​လေ​ကြောင်းမှ ဗုံးကြဲတိုက်ခိုက်​နေ

ကယား(ကရင်နီ)ပြည်နယ် ဒီးမော့ဆိုမြို့ အနောက်ခြမ်းရှိ လိုဘာခို​ကျေးရွာကို အကြမ်းဖက်စစ်ကောင်စီက ​​လေ​ကြောင်းမှ ဗုံးကြဲတိုက်ခိုက်နေသည်ဟု ဒေသခံသတင်းရင်းမြစ်များက လူထုနွေဦးသို့ ပြောသည်။

ယနေ့(ဖေဖော်ဝါရီ ၂၇) နံနက် ၈နာရီခန့်က စတင်၍ အကြမ်းဖက်စစ်တပ်က လက်နက်ကြီးနှင့် လေယာဥ် များအသုံးပြု တိုက်ခိုက်နေသည်ဟု ၎င်းတို့က ဆိုသည်။

“ဒီပုံစံအတိုင်းဆိုရင် ကရင်နီပြည်တခုလုံးကို အကြမ်းဖက်စစ်တပ်က တိုက်ဖို့များတယ်။လိုဘာခို ကျေးရွာဆိုတာ တောင်ငူဘက်က စစ်ခွေးတပ်တွေ တောက်လျှောက်ဝင်လို့ရတယ်။ ဒါ့ကြောင့် သူတို့ ဝင်ပေါက်ကို အရင်ရှင်းနေတယ်လို့ သုံးသပ်လို့ရတယ်။ပြီးရင် တပ်ရင်းတွေအလိုက် စစ်ထိုးကြမယ်လို့ သုံးသပ်ရတယ်”ဟု ကရင်နီပြည်နယ်ရှိ ဒေသခံတစ်ဦးက ပြော သည်။

ထို့ကြောင့် ကရင်နီ ပြည်နယ်ကို အတိုင်းအဆမရှိ စစ်ထိုးရန် အကြမ်းဖက်စစ်တပ်၏ အားထုတ်နေမှုကို ပြည်သူများအနေဖြင့် လူအား၊ငွေအား အပါအဝင် သတင်းများ ပေးပို့ပေးကြရန်လည်း ပြည်သူ့ကာကွယ်ရေးတပ်များက မေတ္တာရပ်ခံသည်။

Public Service Announcement

“လက်ရှိ စစ်ရေးအနေအထားအရတော့ အရေးအကြီးဆုံးအခြေအနေပဲလို့ ပြောပါရစေ။ရှေ့လျှောက် တိုက်ပွဲတွေ ပြင်းထန်လိမ့်မယ်။ကရင်နီပြည်နယ်ကို ဝိုင်းကူ ကြပါလို့ပဲ တောင်းဆိုပါရစေ”ဟု ဒီးမော့ဆို ပြည်သူ့ကာကွယ်ရေးတပ်ဖွဲ့တာဝန်ရှိသူတစ်ဦးက ပြောသည်။

ယခုလလယ်က စတင်ခဲ့သော ကရင်နီပြည်နယ်အတွင်း အကြမ်းဖက်စစ်ကောင်စီ၏ ထိုးစစ်များတွင် မြေပြင် စစ်ကြောင်း၊လက်နက်ကြီး နှင့် သံချပ်ကာ ယာဥ်များကို ခုခံတိုက်ခိုက်နိုင်သော်လည်း လေယာဥ်ဖြင့် တိုက်ခိုက်ခံနေရ ခြင်းမှာ ပြည်သူ့ကာကွယ်ရေး တပ်ဖွဲ့ဝင်များအတွက် အထိအခိိုက် အကျဆုံးများရှိနေရသည်။

ထို့ကြောင့် လေယာဥ်ပစ်လက်နက်များဝယ်ယူနိုင်ရေး တွင် ပြည်တွင်း၊ပြည်ပ နေပြည်သူများ ငွေအားပါဝင်ပေးကြရန် ကရင်နီပြည်သူ့ကာ ကွယ်ရေးတပ်များက တိုက်တွန်းလျက်ရှိသည်။

ဖေဖော်ဝါရီ ၁၆ ရက်ကစ၍ မိုးဗြဲ၊ဖယ်ခုံနှင့် ဒီးမော့ဆို မြို့နယ်များအတွင်း တိုက်ပွဲများ၌ အကြမ်းဖက်စစ်ကောင်စီတပ်ဘက်မှ ၁၀၀ကျော် သေဆုံးကာ ပြည်သူ ကာကွယ်ရေး တပ်ဖွဲ့ဝင်များမှလည်း ၃၀ကျော် ကျဆုံးထားသည်။