စစ်ကိုင်းတိုင်း၊ ကသာမြို့နယ်တွင် အကြမ်းဖက်စစ်ကောင်စီ၏တရားမဝင်လုပ်ငန်းများလည်ပတ်ခြင်းမရှိစေရန်နှင့် အများပြည်သူလုံခြုံရေး၊ တရားဥပဒေစိုးမိုးရေးရရှိစေရန် ကသာမြို့နယ် ပြည်သူ့အုပ်ချုပ်ရေးအဖွဲ့က အချက်ခြောက်ချက်ပါသော အမိန့်ကြေညာချက်ထုတ်ပြန်သည်။
ယမန်နေ့ (ဖေဖော်ဝါရီလ ၂၇ ရက်နေ့)တွင် ကသာမြို့နယ်ပြည်သူ့အုပ်ချုပ်ရေးအဖွဲ့က ထုတ်ပြန်ကြေညာလိုက်ခြင်းဖြစ်ပြီး အဆိုပါကြေညာချက်တွင် ကသာမြို့နယ်အတွင်းရှိ အများပြည်သူများ၏ လုံခြုံရေး၊ တရားဥပဒေစိုးမိုးရေးအတွက်လည်းကောင်း၊ အကြမ်းဖက်စစ်ကောင်စီ၏တရားမဝင်လုပ်ငန်းများ လည်ပတ်နိုင်ခြင်းမရှိစေရန်အတွက်လည်းကောင်း၊ ကသာမြို့နယ်ပြည်သူ့အုပ်ချုပ်ရေးအဖွဲ့မှအမိန့်ထုတ်ပြန်လိုက်ခြင်းဖြစ်သည်ဟုဖော်ပြထားသည်။
ကသာမြို့နယ်အတွင်း မူးယစ်ဆေးဝါးများ ရောင်းဝယ်ခြင်း၊ သုံးစွဲခြင်းမပြုလုပ်ကြရန်၊ ကြက်ဝိုင်းများအပါအဝင် မည်သည့်လောင်းကစားဝိုင်းမျှ လုံးဝ(လုံးဝ) မပြုလုပ်ကြရန်၊ တရားမဝင်သစ်ခုတ်ခြင်း၊ သစ်ခွဲခြင်း၊ သစ်စက်လည်ခြင်း၊ သယ်ဆောင်ခြင်းများ မပြုလုပ်ကြရန်၊ စစ်ကောင်စီနှင့်ပတ်သက်သော မည်သည့်ထုတ်ကုန်ကိုမဆို ဝယ်ယူရောင်းချခြင်းမပြုရန်၊ တရားမဝင်ရွှေသတ္တုနှင့် အခြားသယံဇာတများ တူးဖော်လုပ်ကိုင်ခြင်းမပြုရန်၊ နိုင်ငံတော်ပိုင် သစ်တောကြိုးဝိုင်း/ကြိုးပြင် (ယင်းခဲကြိုးဝိုင်း)ဧရိယာအတွင်း တရားမဝင်နှစ်ရှည်ပင်များ စိုက်ပျိုးလုပ်ကိုင်ခြင်းမပြုရန်ကြေညာထားသည်။
အဆိုပါစည်းကမ်းချက်များအား လိုက်နာဆောင်ရွက်ကြရန်နှင့် လိုက်နာခြင်းမရှိပါက အမျိုးသားညီညွတ်ရေးအစိုးရ၏ လမ်းညွှန်ချက်များနှင့်အညီ ဥပဒေအရအရေးယူဆောင်ရွက်သွားမည်ဟု ကသာမြို့နယ်ပြည်သူ့အုပ်ချုပ်ရေးအဖွဲ့၏ ထုတ်ပြန်ချက်တွင် သတိပေးသည်။
Public Service Announcement
ကသာမြို့နယ်တွင် အကြမ်းဖက်စစ်ကောင်စီတပ်နှင့် ဒေသတွင်း ပြည်သူ့ကာကွယ်ရေးအဖွဲ့များ ဖေဖော်ဝါရီလဆန်းမှစတင်ကာ တကျော့ပြန်တိုက်ပွဲများဖြစ်ပွားနေပြီး အကြမ်းဖက်စစ်ကောင်စီဘက်မှ သေဆုံးထိခိုက်မှုများစွာရှိနေသည်။
