● “ပြည်သူတွေကိုပြောချင်တာကတော့ ငြိမ်နေရင်ပင့်ကူအိမ်မှာငြိနိုင်တယ်။ ရုန်းထွက်ရင်သံကြိုးတွေတောင် ပြတ်နိုင်ပါတယ်ဆိုတာ ပြောချင်ပါတယ်”ဟုကျောင်းသားသမဂ္ဂမှတာဝန်ရှိသူပြော
စစ်ကိုင်းတိုင်း၊ ဝက်လက်မြို့နယ်တွင် မြို့နယ်ကျောင်းသားသမဂ္ဂအဖွဲ့အခြေစိုက်နေရာသို့ အာဏာသိမ်းစစ်တပ် ဝင်ရောက်စီးနင်းခဲ့ပြီး ကျောင်းသားအချို့ဖမ်းဆီးခံရကြောင်း ဝက်လက်မြို့နယ်အခြေစိုက်ကျောင်းသားသမဂ္ဂများအဖွဲ့က သတင်းထုတ်ပြန်သည်။
ယမန်နေ့ (မတ်လ ၁ ရက်နေ့) နေ့လယ်ပိုင်းကဝက်လက်မြို့နယ်အခြေစိုက်ကျောင်းသားသမဂ္ဂများအဖွဲ့၏ အလုပ်အမှုဆောင်အဖွဲ့ တည်ရှိရာနေရာသို့ အကြမ်းဖက် စစ်ကောင်စီတပ်မှ အင်အားအလုံးရင်းဖြင့် ဝင်ရောက်ဖမ်းဆီးခဲ့ကြောင်း၊ ဝင်ရောက်ဖမ်းဆီးသည့် နေရာနှင့် သတင်းအတိကျကို အကြောင်းအမျိုးမျိုးကြောင့် ထပ်မံကြေညာပေးမည်ဖြစ်ပြီး ယခုအချိန်ထိ အလုပ်အမှုဆောင်များအားလုံးသထဲမှ မည်သူမည်ဝါ အဖမ်းဆီးခံရခြင်း သတင်းအတိကျမရသေးကြောင်း ဝက်လက်မြို့နယ်အခြေစိုက်ကျောင်းသားသမဂ္ဂများအဖွဲ့ကယနေ့(မတ်လ ၂ ရက်နေ့)တွင် ထုတ်ပြန်အသိပေးသည်။
“ကျွန်တော်တို့ကတော့ ဖိရင်ကြွပါမယ်။ပြည်သူတွေကိုပြောချင်တာကတော့ ငြိမ်နေရင်ပင့်ကူအိမ်မှာငြိနိုင်တယ်။ ရုန်းထွက်ရင်သံကြိုးတွေတောင် ပြတ်နိုင်ပါတယ်ဆိုတာ ပြောချင်ပါတယ်။”ဟု ဝက်လက်နယ် အ.ထ.က ရွှေပန်းကုံး ကျောင်းသားများသမဂ္ဂအဖွဲ့ တာဝန်ရှိသူက People’s Spring သို့ပြောသည်။
Public Service Announcement
ဝက်လက်မြို့နယ်သည် အကြမ်းဖက်စစ်ကောင်စီအား ရရာလက်နက်ဖြင့်ခုခံတိုက်ခိုက်နေသည့်ဒေသတစ်ခုဖြစ်ပြီး အရှေ့ပိုင်း၊ အနောက်ပိုင်း နှစ်ပိုင်းခွဲကာ ခုခံတိုက်ခိုက်နေကြသည်။တချိန်တည်းတွင် ကျောင်းသားများ ၊ပြည်သူများကလည်း စစ်အာဏာရှင်ပြုတ်ကျရေး ဆန္ဒထုတ်ဖော်မှုကိုဆက်တိုက်ပြုလုပ်နေသော ဒေသတစ်ခုဖြစ်သည်။
