အီရတ်နိုင်ငံက အမေရိကန် ကောင်စစ်ဝန်ရုံး တစ်ခုကို ဒုံးကျည် တစ်ဒါဇင်လောက်နဲ့ ပစ်ခတ် တိုက်ခိုက်မှု ကြုံတွေ့ခဲ့ကြောင်း သိရပါတယ်။
အီရတ်နိုင်ငံ၊ ကာဒစ္စတန် ပြည်နယ်ရဲ့ မြို့တော် အာရ်ဘီလ်မှာ ရှိနေတဲ့ အမေရိကန် ကောင်စစ်ဝန်ရုံး တဝိုက်ကို မတ်လ ၁၂ ရက် ညပိုင်းက ဒုံးကျည်တွေ ကျရောက်လာခဲ့တာ ဖြစ်ပါတယ်။ ဒီဖြစ်ရပ်မှာ အသေအပျောက် မရှိခဲ့ပေမယ့် ဒုံးကျည် ထိမှန်တဲ့ အဆောက်အအုံ တချို့တော့ ထိခိုက် ပျက်စီးခဲ့ပါတယ်။
အမေရိကန် နိုင်ငံခြားရေး ဝန်ကြီးဌာန ပြောရေးဆိုခွင့်ရ အရာရှိ တစ်ယောက်ကတော့ ဒီဒုံးကျည်တွေကို အီရန် ပိုင်နက်ထဲကနေ ပစ်ခတ်ခဲ့တာလို့ ဆိုပါတယ်။ အခုလုပ်ရပ်ဟာ အီရတ် နိုင်ငံရဲ့ အချုပ်အခြာ အာဏာ ပိုင်ဆိုင်မှုကို ထိပါးပြီး အကြမ်းဖက် သဘောထားတွေကို ပြသနေတယ်လို့လည်း အဲဒီ အရာရှိက ပြစ်တင် ဝေဖန်သွားခဲ့ပါတယ်။
အာဘီလ်မှာ အသစ် တည်ဆောက်ထားတဲ့ အမေရိကန် ကောင်စစ်ဝန်ရုံးမှာ အပျက်အစီး မရှိခဲ့သလို ရုံးဝန်ထမ်း တစ်ယောက်မှလည်း ဒဏ်ရာ မရခဲ့ကြောင်း အမည်မဖော်လိုတဲ့ အရာရှိက ပြောပါတယ်။ အီရတ် အာဏာပိုင်တွေကတော့ အာရ်ဘီလ် မြို့ထဲကို ကျရောက် ပေါက်ကွဲတဲ့ ဒုံးကျည် အရေအတွက် တစ်ဒါဇင်လောက်ထိ များပြားနိုင်ကြောင်း ထုတ်ပြန်ထားပါတယ်။
Public Service Announcement
ကာဒစ္စတန်ဟာ ကာ့ဒ်မျိုးနွယ်စုတွေ အဓိက နေထိုင်တဲ့ ပြည်နယ်တစ်ခုပါ။ အခု တိုက်ခိုက်မှုကို ပြည်နယ် အစိုးရနဲ့ အီရတ် အစိုးရတို့ ပူးပေါင်းပြီး စုံစမ်း စစ်ဆေးသွားမယ်လို့ ဆိုပါတယ်။ ဒုံးကျည်တွေ ကျရောက် ပေါက်ကွဲတဲ့ ကိစ္စကို အမေရိကန် ကောင်စစ်ဝန်ရုံးက အတည်ပြုပေမယ့် ဘယ်အမျိုးအစား ဒုံးကျည်တွေလဲ ဆိုတာကိုတော့ မှတ်ချက် မပေးခဲ့ပါဘူး။
အမေရိကန်ရဲ့ မဟာမိတ် အစ္စရေးက ဆီးရီးယားနိုင်ငံ၊ ဒမတ်စကက် မြို့တော်နားမှာ လေကြောင်းက တိုက်ခိုက်ခဲ့တာကြောင့် အီရန် တော်လှန်ရေး အစောင့်တပ်ဖွဲ့ဝင် နှစ်ဦး သေဆုံးခဲ့ပြီး ရက်ပိုင်း အကြာမှာပဲ အခုလို ဒုံးကျည် ပစ်ခတ်မှုတွေ ကြုံတွေ့လာတာလို့ သိရပါတယ်။
