ဖာပွန်မှာ စစ်တပ်က လက်နက်ကြီးနဲ့ ပစ်နေလို့ ရွာလုံးကျွတ်နီးပါးထွက်ပြေးနေရ

စစ်ရေးတင်းမာနေတဲ့ ဖာပွန်ခရိုင်ထဲမှာ စစ်ကောင်စီတပ်တွေက အင်အားတိုးချဲ့နေပြီး လက်နက်ကြီးနဲ့ပစ်ခတ်မှုကြောင့် မထောကျေးရွာအုပ်စုက ပြည်သူတွေအားလုံးနီးပါး ထွက်ပြေးပုန်းရှောင်နေကြရတယ်လို့ မူတြော်သတင်းစဉ်က ထုတ်ပြန်ပါတယ်။

ပြီးခဲ့တဲ့ မတ်လ ၁၀ ရက်က လမ်းလုံခြုံရေးအကြောင်းပြပြီး လှုပ်ရှားနေတဲ့ စစ်ကောင်စီနဲ့ နယ်ခြားစောင့်တပ်တွေဟာ ခွေးသေနဲ့ မထောကျေးရွာကြားမှာရှိတဲ့သွာခိုလို၊ တာဟူးလို၊ သာမစူလိုနဲ့ ဃေါ်ကလားကျေးရွာတွေထဲကို လက်နက်ကြီးနဲ့ ၁၅ ချက်ခန့်ပစ်ခတ်ခဲ့တာပါ။

ဒီလိုပစ်ခတ်မှုကြောင့် ကျေးရွာအတွင်းက ဒေသခံပြည်သူတွေဟာ စိုးရိမ်ကြောက်ရွံ့တဲ့အတွက် ဘေးလွတ်ရာကို ထွက်ပြေးပုန်းရှောင်နေကြရတယ်လို့ မူတြော်သတင်းစဉ်မှာ ဖော်ပြထားထားပါတယ်။

ဒါ့အပြင် မတ်လ ၁၀ ရက်မနက် ၁၁ နာရီအချိန်မှာ ဖွေးပူးလူးဘက်ကိုမောင်းနှင်လာတဲ့ BGF ကားကို KNLA တပ်မဟာ ၅ က ကြားဖြတ်တိုက်ခိုက်ခဲ့ရာ ကားတစ်စီးထိမှန်ပျက်စီးသွားခဲ့ပြီး ကောကော်ထာနဲ့ ဘလောစိုးကြားမှာရှိတဲ့ စစ်ကောင်စီစခန်းတစ်ခုကို တပ်မဟာ ၅ က ဝင်ရောက်တိုက်ခိုက်ခဲ့ရာ စစ်ကောင်စီဘက်က တစ်ဦးသေဆုံးပြီး နှစ်ဦးဒဏ်ရာရရှိသွားခဲ့တယ်လို့ မူတြော်သတင်းစဉ်ရဲ့ ထုတ်ပြန်ထားချက်အရ သိရပါတယ်။

Public Service Announcement

စစ်ရေးပဋိပက္ခတွေ ပြင်းထန်နေတဲ့ ဖာပွန်ခရိုင်ထဲမှာ စစ်ကောင်စီဘက်က ထိခိုက်သေဆုံးဒဏ်ရာရရှိတာတွေပိုမိုများပြားနေခဲ့ပြီး စစ်ရေးအင်အားတိုးချဲ့မှုတွေ ပိုမိုပြုလုပ်လာခဲ့ကာ ဒီကနေ့မတ်လ ၁၄ ရက် မနက်ပိုင်းကလည်း မြိုင်ကြီးငူဒေသဘက်ကို စစ်ကား ၁၃ စီးခန့်နဲ့ ရောက်ရှိလာခဲ့တယ်လို့ နယ်မြေခံတွေရဲ့ ပြောကြားချက်အရ သိရပါတယ်။