အကြမ်းဖက်စစ်ကောင်စီတပ်သားများ တင်ဆောင်လာသည့် စစ်ကား ၁၀စီးကျော်မှာ ကရင်နီ(ကယား) ပြည် နယ်သို့ ဦးတည်လာပြီး ထိုးစစ်ဆင်ရန်ထပ်မံအင်အားဖြည့်တင်းနေကြောင်း ဒေသခံသတင်းရင်းမြစ်များက People’s Springသို့ ပြောသည်။
ယနေ့(မတ်လ ၁၇ ရက်) နံနက် ၃ နာရီခန့်က ရှမ်း-ကယားဒေသအစပ်မြို့များသို့ အဆိုပါအင်အား ဖြည့်စစ်ယာဥ်တန်းများ ဖြတ်သန်းသွားသည်ဟု Kayan Generation Youth ပြန်ကြားရေး တာဝန်ခံက ဆိုသည်။
“အတိအကျဆို မနက် ၃ နာရီ ၄၄ မိနစ်မှာ ပင် လောင်းကို ဖြတ်သွားခဲ့တယ်။အဲဒီကနေ ဖယ်ခုံ – မိုးဗြဲ-လွိုင်ကော် လမ်းအတိုင်းဆက်တက်နေတာပေါ့”ဟု ၎င်းက ပြော သည်။
နေ့စဥ်နှင့်အမျှ ကရင်နီဒေသတွင်း အပါအဝင် ၎င်းနှင့် ဆက်စပ်နေသည့် ဖယ်ခုံ နှင့် မိုးဗြဲမြို့တို့၌ တိုက်ပွဲများဖြစ်ပွားနေကာ အကြမ်းဖက်စစ် ကောင်စီတပ်က လေယာဥ်များ အပါအဝင် ယခုနောက်ပိုင်းတွင် အတွဲလိုက်ဒုံး စနစ်များဖြင့် ထိုးစစ်ဆင်နေသည်။
Public Service Announcement
“အခု သူတို့အင်အားဖြည့်နေတဲ့ လမ်းကြောင်းအတိုင်းဆို ရင် ဖယ်ခုံနဲ့ မိုးဗြဲကို စစ်အင်အား ထပ်တိုးတာလို့ပဲ ယေဘုယျပြောလို့ရတယ်”ဟု ဖယ်ခုံ PDF တာဝန်ရှိသူတစ်ဦးက သုံးသပ်သည်။
ယမန်နေ့က ဖယ်ခုံမြို့နယ် ဆောင်ကန်းကျေးရွာ၌ တိုက်ပွဲပြင်းထန်ခဲ့ပြီး ပြည်သူ့ကာကွယ်ရေးတပ် ဖယ်ခုံ PDF ရဲဘော်နှစ်ဦး ကျဆုံးကာ ငါးဦးဒဏ်ရာရရှိခဲ့သည်။တိုက်ပွဲတွင် စစ်ကောင်စီတပ်ဘက်မှ ထိခိုက်ကျဆုံးမှုများကို အတည်မပြုနိုင်သေးပေ။
ထို့အပြင် ယနေ့(မတ်လ ၁၇ ရက်) နံနက် ၆ နာရီခွဲခန့်ကစ၍ ဒီးမောဆိုမြို့တွင် တိုက်ပွဲဖြစ်ပွားနေပြီး အကြမ်းဖက်စစ်ကောင်စီက လက်နက်ကြီးအများအပြား အသုံးပြုနေသည်ဟု သိရသည်။
