ရှမ်းပြည်နယ်မြောက်ပိုင်း မူဆယ်မြို့နယ် မုံးကိုးဒေသ၌ ကချင်လက်နက်ကိုင်အဖွဲ့(KIA)နှင့် အာဏာသိမ်းစစ်တပ်တို့ နှစ်ရက်ဆက် တိုက်ပွဲဖြစ်ပွားခဲ့ကြောင်း KIA သတင်းနှင့် ပြန်ကြားရေးဌာန Kachinnet Burmese က ယနေ့ သတင်းထုတ်ပြန်သည်။
KIA တပ်မဟာ(၆)၊ တပ်ရင်း (၃၆)နယ်မြေ မုံးကိုးဒေသ ဒါလုံ၊ မန်ဂျန်ဘွမ် ၌ ယနေ့ ဇူလိုင် ၁၉ရက် နံနက်က တိုက်ပွဲဖြစ်ပွားခဲ့ကြောင်း၊ အာဏာသိမ်းစစ်တပ်မှ မန်ဂျန်ဘွမ်ဘက်သို့ စစ်အင်အားတိုးချဲ့လာ၍ KIA က ခုခံတိုက်ခိုက်ခဲ့ခြင်းဖြစ်ကြောင်း ဖော်ပြသည်။
အာဏာသိမ်းစစ်တပ်သည် ဇူလိုင် ၁၈ရက်ကလည်း မော်တောင်၊ ဒါလုံး ဒေသသို့ စစ်ရေးလှုပ်ရှားမှု ပြုလုပ်လာ၍ ယင်းနေ့ကတည်းက တိုက်ပွဲဖြစ်ပွားခဲ့ခြင်းဖြစ်သည်ဟု ဆိုသည်။
ထို့ပြင် ဖောင်းဆိုင်ကျေးရွာ၌ တပ်စွဲထားသည့် အာဏာသိမ်းစစ်တပ်သည် လက်နက်ကြီးများဖြင့် ရမ်းသမ်းပစ်ခတ်၍ ဒေသခံပြည်သူများ ထွက်ပြေးတိမ်းရှောင်နေကြရကြောင်း ၊ ၎င်းဒေသအတွင်းအာဏာ သိမ်းစစ်တပ်မှ စစ်ရေးလှုပ်ရှားမှု၊ ထိုးစစ်ဆင်မှု စဉ်ဆက်မပြတ် ပြုလုပ်နေ၍ တိုက်ပွဲ ဆက်လက်ဖြစ်ပွားနိုင်ချေရှိကြောင်း Kachinnet Burmese က ဖော်ပြခဲ့သည်။
Public Service Announcement
အဆိုပါ မုန်းကိုးဒေသ၌ ကိုးကန့်လက်နက်ကိုင်အဖွဲ့(MNDAA) တပ်လည်း လှုပ်ရှားမှုရှိရာ ဇူလိုင် ၁၂ရက်က စစ်ကောင်စီတပ်နှင့် MNDAA တပ်များ တိုက်ပွဲဖြစ်ပွားခဲ့သည်။
တိုက်ပွဲအတွင်း စစ်ကောင်စီတပ်ဖွဲ့ဝင် များ သေဆုံးမှုရှိပြီး လက်နက်ခဲယမ်းများ သိမ်းဆီးရမိခဲ့ကြောင်း ကိုးကန့်အဖွဲ့က ထုတ်ပြန်ထားသည်။
