စစ်တပ်က လက်နက်ကြီးနဲ့ပစ်လို့ နေအိမ်အချို့ပျက်စီး

ကေအဲန်ယူ ဒူးပလာယာခရိုင် ကျုံဒိုးမြို့နယ် တောင်ကြာအင်းကျေးရွာထဲမှာ မနေ့ညက KNLA တပ်မဟာ ၆ နဲ့ စစ်ကောင်စီတပ်တို့အကြား တိုက်ပွဲထပ်မံဖြစ်ပွားခဲ့ပြီး စစ်ကောင်စီဘက်ကပစ်လိုက်တဲ့လက်နက်ကြီးကြောင့် ကျေးရွာအတွင်းက နေအိမ်အချို့ ထိမှန်ပျက်စီးသွားခဲ့တယ်လို့ ကရင်လူ့အခွင့်အရေးအဖွဲ့(KHRG)ထံကနေ သိရပါတယ်။

မနေ့ညပိုင်းက တောင်ကြာအင်းကျေးရွာမှာ တိုက်ပွဲပြင်းထန်ခဲ့တာဖြစ်ပြီး တိုက်ပွဲဖြစ်ပွားနေချိန်အတွင်း စစ်ကောင်စီဘက်က လက်နက်ကြီးအဆက်မပြတ်ပစ်ခတ်တာကြောင့် အိမ်အချို့ထိမှန်ပျက်စီးသွားခဲ့တယ်လို့ KHRG ပြောခွင့်ရသူ စောနန္ဒဆူးက ဆိုပါတယ်။

“ညတုန်းက တော်တော်ပြင်းထန်တယ်။ တိုက်ပွဲဖြစ်တာ”လို့ စောနန္ဒဆူးက ပြောပါတယ်။

ကျုံဒိုးမြို့နယ် တောင်ကြာအင်းကျေးရွာဘက်မှာ ပြီးခဲ့တဲ့ မတ်လ ၁၁ ရက်နေ့က တိုက်ပွဲတွေစတင်ဖြစ်ပွားခဲ့တာဖြစ်ပြီး တိုက်ပွဲကြောင့် တောင်ကြာအင်းကျေးရွာက ရွာသားတွေဟာ တခြားရွာတွေဘက်ကို ထွက်ပြေးတိမ်းရှောင်နေရပြီး အကူအညီတွေလိုအပ်လျက်ရှိနေတယ်လို့ KHRG ရဲ့ ထုတ်ပြန်ထားတာပါ။

Public Service Announcement

မတ်လ ၂၃ ရက်ကလည်း တောင်ကြာအင်းကျေးရွာထဲကို စစ်ကောင်စီတပ်က လက်နက်ကြီးပစ်ခတ်ခဲ့လို့ နေအိမ်တစ်လုံးထိခိုက်ပျက်စီးသွားခဲ့သေးပြီး လက်နက်ကြီးအချို့မှာ မပေါက်ကွဲသေးပဲ ကျန်ရှိနေသေးတယ်လို့ KHRG ရဲ့ ထုတ်ပြန်ချက်အရ သိရပါတယ်။