▪️သွေးကြွေးဆပ်မည်ဟု အောင်ပန်းမြို့ပြပြောက်ကျား တပ်စု ကြေညာ
ရှမ်းပြည်နယ်တောင်ပိုင်း ပင်းတယမြို့ပေါ် တွင် အကြမ်းဖက်စစ်ကောင်စီအား ပစ်ခတ်တိုက်ခိုက်စဥ် ကျဆုံးခဲ့သည့် ပြည်သူ့ကာကွယ်ရေးရဲဘော်နှစ်ဦးမှာ ကလောမြို့နယ်အခြေစိုက် ပြောက်ကျားတပ်ဖွဲ့တစ်ခုဖြစ်သော Underground Revolution – UGRအဖွဲ့မှဖြစ်ကြောင်း အသိပေးထုတ်ပြန်သည်။
ဧပြီ ၄ရက် ညနေ ၂နာရီ၃၀ခွဲခန့်က ပင်းတယမြို့အရှေ့ဘက်အထွက် ရွာငယ်တံတားဂိတ်အနီးမှ အကြမ်းဖက်စစ်ကောင်စီတပ်ကို လူငယ်နှစ်ဦးက သွားရောက်တိုက်ခိုက်စဥ် အပြန်အလှန်ပစ်ခတ်မှုဖြစ်ပြီး ကျဆုံးခဲ့ခြင်းဖြစ်သည်။
ယင်းဖြစ်စဥ်တွင် အကြမ်းဖက်စစ်ကောင်စီဘက်ကလည်း နှစ်ဦးသေဆုံးပြီး အများအပြားဒဏ်ရာရရှိခဲ့သည်။ ကျဆုံးသူလူငယ်နှစ်ဦးမှာ ကလောမြို့နယ်အခြေစိုက် ပြောက်ကျားတပ်ဖွဲ့တစ်ခုဖြစ်သော Underground Revolution – UGRအဖွဲ့မှဖြစ်ကြောင်း
အောင်ပန်းမြို့ပြပြောက်ကျားတပ်စု – UTF-ABN က ယဧပြီ ၅ရက်တွင် ထုတ်ပြန်သည်။
Public Service Announcement
လက်နက်အင်အားမမျှတမှုကြောင့် ကျဆုံးခဲ့ရသောရဲဘော်များ၏ တော်လှန်ရေးစိတ်ဓါတ်ပြင်းပြမှုကို လေးစားကြောင်းနှင့် ကျန်ရဲဘော်များက တော်လှန်ရေး လုပ်ငန်းစဉ်များကို ဆက်လက်ဆောင်ရွက်သွားမည်ဖြစ်ကြောင်း သတင်းထုတ်ပြန်သည်။
ထို့အပြင် ကျဆုံးရဲဘော်နှစ်ဦးအတွက် သွေးကြွေးကိုလည်း ပြန်လည်ရယူမည်ဟု ကတိသစ္စာပြုကြောင်း အောင်ပန်းမြို့ပြပြောက်ကျားတပ်စုက ထုတ်ပြန်ထားသည်။
ဓနုကိုယ်ပိုင်အုပ်ချုပ်ခွင့်ရဒေသ ပင်းတယနှင့် ရွာငံတွင်
ပင်းတယမြို့ပြပြောက်ကျားတပ်ဖွဲ့ (UGP)နှင့် ရွာငံပြည့်သူ့ကာကွယ်ရေးတပ်ဖွဲ့(YPDF) ရှိပြီး ဧပြီ ၄ရက်က တိုက်ခိုက်မှုကို UGP ရောYPDFပါ ကြိုတင်မသိခဲ့ပေ။
” ရဲဘော်နှစ်ယောက်ကျဆုံးတယ်ဆိုလို့ ပြန်စိစစ်တော့ ဒီဘက်(UGP နှင့်YPDF)ကမဟုတ်လို့ အံ့သြနေတာ။ ကလောက လာတိုက်ခိုက်တယ်ဆိုတာ ထုတ်ပြန်မှ သိရတယ်။ရဲဘော်တွေက စစ်ခွေးတွေကို တွေ့ရာနေရာမှာ တိုက်ခိုက်ချင်နေကြတဲ့အထိ စိတ်အားထက်သန်နေတာ”ဟု ရွာငံဒေသခံတစ်ဦးက ပြောသည်။
ကျဆုံးပြည်သူ့ကာကွယ်ရေးရဲဘော်နှစ်ဦးကို စစ်ကောင်စီက ပင်းတယဆေးရုံတွင် ထားရှိပြီး ဆေးရုံကို လုံခြုံရေးတင်းကြပ်ထားသည်ဟု ဒေသခံများက ပြောသည်။
