●နေရာစုံမှ တိုက်ခိုက်မှုကြောင့် စစ်ကောင်စီစစ်ကြောင်း ဆယ်ရက်ခန့် အကြာတွင် ဆယ်ဦးခန့်သာကျန်ဟုဆို
ယင်းမာပင်နယ်ဘက်မှ ထွက်ခွာလာပြီးမြိုင်မြို့နယ်အတွင်းသို့ အကျအဆုံးများစွာဖြင့်ရောက်ရှိလာသည့် စစ်ကောင်စီတပ်ကို ဆီးကြိုတိုက်ခိုက်ရာ စစ်ကောင်စီဘက်က အရာရှိတစ်ဦးအပါအဝင် အများအပြား သေဆုံးသွားသည်ဟု ပြည်သူ့ကာကွယ်ရေးမဟာမိတ်အဖွဲ့များက သတင်းထုတ်ပြန်သည်။
မြိုင်မြို့နယ်သီးပင်ကိုင်းကျေးရွာသို့ ရောက်ရှိလာသည့်စစ်ကောင်စီတပ်အား မြိုင်အခြေစိုက် ကျားသစ်နက်ပြောက်ကျားတပ်ဖွဲ့နှင့် မဟာမိတ် တပ်ပေါင်းစုများက ဧပြီ ၉ရက် နံနက်တွင် တိုက်ခိုက်ခဲ့သည်။
“စစ်ခွေးတွေကို အပိုင်ပစ်တာ။ ကျတော်တို့မှာ လက်နက်က အရင်ကထက် ပိုအဆင်ပြေလာလို့ ပိုင်ပိုင်နိုင်နိုင်ပစ်တာ။ သေဆုံးစာရင်း အတိအကျမရပေမယ့် တော်တော်များများသေတယ်။ အရာရှိတစ်ကောင်ပါတယ်” ဟု ပြည်သူ့ကာကွယ်ရေးမဟာမိတ်အဖွဲ့မှ ရဲဘော်တစ်ဦးကပြောသည်။
Public Service Announcement
“မဟာမိတ်တပ်ပေါင်းစုများက လက်နက်ကြီလက်နက်ငယ်များဖြင့် ဝိုင်းဝန်းတိုက်ခိုက်ခဲ့ရာ အကောင်ကြီးတစ်ကောင်အပါအဝင်အများအပြား သေဆုံးကာ အများအပြား ဒဏ်ရာရရှိသွားခဲ့ပါသည်” ဟု ကျားသစ်နက်ပြောက်ကျားတပ်ဖွဲ့က ယနေ့(ဧပြီ ၁၀ရက်)ညတွင် သတင်းထုတ်ပြန်သည်။
မြိုင်နယ်သို့ ရောက်လာသည့် စစ်ကောင်စီစစ်ကြောင်းသည် မတ်လကုန်ခန့်ကစတင်ကာ ယင်းမာပင်မြို့ဘက်မှ ခြေလျင်စစ်ကြောင်းဖြင့် လာခဲ့ပြီး လမ်းခုလတ်တွင် တိုက်ခိုက်ခံရမှုများကြောင့် ဆယ်ဦးခန့်သာကျန်ရစ်တော့သည်ဟု ကျားသစ်နက်ပြောက်ကျားတပ်ဖွဲ့က သတင်းထုတ်ပြန်ချက်တွင်ဖော်ပြထားသည်။
ယမန့်နေ့ နံနက်ကလည်း ပခုက္ကူ-မြိုင် ကားလမ်းမကြီးပေါ်တွင် စစ်ကောင်စီနှင့် ပျုစောထီးများ မောင်းနှင်လာသည့် ယဥ်တန်းကို ပြည်သူ့ကာကွယ်ရေးမဟာမိတ်အဖွဲ့သုံးဖွဲ့က ပဒေ သာ မိုင်းဖြင့် တိုက်ခိုက်ခဲ့ရာ စစ်ကောင်စီ အကျအရှုံးများခဲ့သည်။
