ရှမ်းပြည်နယ်မြောက်ပိုင်းတွင် စစ်ကောင်စီ၏ ပေါ်တာစွဲခံရပြီးနောက် တိုက်ပွဲအတွင်း သေဆုံးသွားသူနှစ်ဦးအနက်တစ်ဦးသည် ရှမ်းပြည်ညီညွတ်ရေးကော်မတီ အတွင်းရေးမှူးအဖွဲ့ဝင်လူငယ်တစ်ဦးဖြစ်နေပြီး ယင်းအတွက် တာဝန်ယူမှု တာဝန်ခံမှုရှိရန် သေဆုံးသူ၏ မိတ်ဆွေများက တောင်းဆိုလိုက်သည်။
ယမန်နေ့(မေလ ၄ရက်) ညနေက ရှမ်းပြည်ညီညွတ်ရေးကော်မတီ အတွင်းရေးမှူးအဖွဲ့ဝင် စိုင်းစံလှနှင့်အခြားအမျိုးသားတစ်ဦးစီးလာသည့်ကားကို မူဆယ်မြို့နယ် မော့တောင်းရွာအနီးတွင် အကြမ်းဖက်စစ်ကောင်စီက ပေါ်တာဆွဲသွားပြီးနောက် မကြာမီ တိုက်ပွဲဖြစ်ခဲ့သည်။
အကြမ်းဖက်စစ်ကောင်စီနှင့် တအာင်းအမျိုးသားလွတ်မြောက်ရေးတပ်မတော် TNLAတိုက်ပွဲ ဖြစ်ခဲ့ခြင်းဖြစ်ပြီး စစ်ကောင်စီတပ်ဖွဲ့ဝင် ၁၀ဦးနှင့်ပေါ်တာဆွဲခံရသူနှစ်ဦး သေဆုံးခဲ့သည်ဟု ဒေသခံများကပြောသည်။
“စိုင်းစံလှက ခရီးသွားရင်းကနေ ပေါ်တာဆွဲခံရတာ။ အခု သူသေဆုံးရပြီ။ စစ်ကောင်စီ ဘာပြောမလဲဆိုတာ ကျွန်တော်တို့ စောင့်ကြည့်နေမယ်” ဟု စိုင်းစံလှ၏ မိတ်ဆွေတစ်ဦးက People’s Spring သို့ပြောသည်။
Public Service Announcement
စိုင်းစံလှသည် ရှမ်းလူငယ်ကွန်ရက်(Tai Youth Network -TYN)၏ ဦးဆောင်ကော်မတီဝင်လည်းဖြစ်သည်။ စိုင်းစံလှသေဆုံးခြင်းသည် TYNအတွက် ကြီးမားသည့်ဆုံးရှုံးမှုဟု ရှမ်းတိုင်းရင်းသားလူငယ်အချို့က ပြောသည်။
“အရပ်သားတွေကို စစ်တပ်ကပေါ်တာဆွဲတာ သိပ်ဆိုးရွားနေတဲ့ ပြဿနာ။ ဒါကို စစ်တပ်ခေါင်းဆောင်တွေ ဝန်ခံရမယ်။ တာဝန်ခံရမယ်”ဟု အရပ်ဘက်အရေးဆောင်ရွက်သူတစ်ဦးက မှတ်ချက်ပြုသည်။
မူဆယ်မြို့နယ် မော့တောင်းရွာအနီးတွင် ရုတ်တရက်ကွယ်လွန်ခဲ့သည့် စိုင်းစံလှ၏ဖြစ်ရပ်အတွက် မိသားစုဝင်များ၊ လုပ်ဖော်ကိုင်ဖက်ရဲဘော်များအားလုံးနှင့်ထပ်တူ ဝမ်းနည်းကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD) ဗဟိုအလုပ်အမှုဆောင်ကော်မတီက ယနေ့ (မေလ၅ရက်) သဝဏ်လွှာပေးပို့ထားသည်။
