အာဏာသိမ်းစစ်ခေါင်းဆောင်၏အင်းယားလမ်းအိမ်ကို စတင်ရောင်းချတော့မည်၊ရှယ်ယာတစ်စုလျှင် ​ဒေါ်လာတစ်ရာဖြင့်ဝယ်ယူနိုင်မည်

●ဝယ်ယူလိုသူ ပြည်သူနှစ်သောင်းခန့်က ငွေကျပ် ၃၄ ဘီလီယံကျော်ဖြင့် အဆိုပြုထား

အာဏာသိမ်းစစ်ခေါင်းဆောင်မင်းအောင်လှိုင်၏ အင်းလျားလမ်း ခြံအမှတ် ၁၄ နေအိမ်ကို အများပြည်သူဝယ်ယူနိုင်ရန် ကြိုပွိုင့်ဖြင့် စတင်ရောင်းချတော့မည်ဖြစ်ကြောင်း NUG က ကြေညာလိုက်သည်။

ယခုကြိုပွိုင့်ရောင်းချရာတွင် ကာလတန်ကြေး ၃ ပုံ ၁ ပုံ ဖြစ်သည့် ဒေါ်လာ ၁၀ သန်းသာတန်ဖိုး ဖြတ်၍ ထိုဒေါ်လာ ၁၀ သန်းကို အစုရှယ်ယာ​ပေါင်း တစ်သိန်းကို ရှယ်ယာတစ်စုလျှင် ဒေါ်လာ ၁၀၀ဖြင့်​ရောင်းချမည်ဖြစ်ပြီး ပြည်သူများဝယ်ယူနိုင်မည်ဟုသိ့ရသည်။

မင်းအောင်လှိုင်မတရားသဖြင့် ရယူထားသော နိုင်ငံတော်ပိုင်မြေသည် ရန်ကုန်မြို့အင်ယားလမ်း အမှတ် ၁၄ ​မြေကွက်ဖြစ်သည်။ ၁.၈၆ ဧကကျယ်ဝန်းပြီး ကာလပေါက်စျေး အမေရိကန်ဒေါ်လာ သန်း ၃၀ ကျော် တန်ကြေးရှိပြီး ယခုရောင်းချချိန်တွင် ကာလတန်ကြေး၏ ၃ ပုံ ၁ ပုံ ၊ ဒေါ်လာ ၁၀ သန်း တန်ဖိုးဖြတ်၍ အစုရှယ်ယာ ၁ သိန်းတိတိ ရောင်းချသွားမည်ဖြစ်ကြောင်း NUG စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာနက ထုတ်ပြန် သည်။

Public Service Announcement

ရှယ်ယာတစ်စုလျှင် အမေရိကန်ဒေါ်လာ ၁၀၀ သတ်မှတ်ထားပြီး ကမ္ဘာတလွှားရှိ ဆက်သွယ်ဝယ်ယူရရှိနိုင်မည့် ကိုယ်စားလှယ်အမည်စာရင်းနှင့် စတင်ရောင်းချမည့်အချိန်အား သီးခြားထုတ်ပြန်ပေးသွားမည်ဟု ဆိုသည်။

အဆိုပါအိမ်ခြံရောင်းချနိုင်ရေးအတွက် ပြည်သူ့ဆန္ဒကောက်ယူမှု စစ်တမ်း တစ်ခုပြုလုပ်ခဲ့ရာ စစ်တမ်းကောက်ယူမှု ၆ ရက်အတွင်း စုစုပေါင်း ဆန္ဒပြုသူ တစ်သောင်းရှစ်ထောင်ကျော်၏ ၉၇ ရာခိုင်နှုန်း ကျော်က ဝယ်ယူမည်ဟု ဆန္ဒပြုခဲ့သည်ဟု NUG က ထုတ်ပြန်သည်။

ဝယ်ယူရန် အဆိုပြုပမာဏ စုစုပေါင်းမှာ ငွေကျပ် ၃၄ ဘီလီယံကျော် (အမေရိကန်ဒေါ်လာ ၁၇ သန်း) ခန့် ရှိသည်ဟု ဆိုသည်။

အကြမ်းဖက်စစ်ခေါင်းဆောင်မင်းအောင်လှိုင် မတရားသဖြင့်ရယူထားသော အိမ်ခြံရောင်းချမှု သည် အာဏာရှင် အဆုံးသတ်နိဂုံး (The End of Dictatorship-EOD) အစီအစဉ်၏ ကနဦးခြေလှမ်းအဖြစ်လုပ်ဆောင်ခြင်းဖြစ်ပြီး ယင်းအတွက် မဆုတ်မနစ်သော ဇွဲလုံ့လ၊ ခိုင်မာပြတ်သားသောသန္နိဋ္ဌာန်ဖြင့် ပူးပေါင်း ပါဝင်ဝယ်ယူကြသူအားလုံးကို လေးစားဂုဏ်ပြု ဦးညွှတ်ကြောင်း NUG က ထုတ်ပြန်သည်။