ယိုင်နဲ့နေပြီဖြစ်သည့် စစ်ကောင်စီကိုအပြီးတိုင် ပြိုလဲသွားအောင်လုပ်နိုင်ရေး နည်းလမ်းပေါင်းစုံဖြင့် စဉ်းစားအားထုတ်ကြိုးပမ်းကြရန် အမျိုးသားညီညွတ်ရေးအစိုးရ(NUG) ပြည်ထောင်စုဝန်ကြီးချုပ် မန်းဝင်းခိုင်သန်းက ဝန်ကြီး၊ ဒုဝန်ကြီးများအား တိုက်တွန်းပြောကြားခဲ့သည်။
အမျိုးသားညီညွတ်ရေးအစိုးရ၏ အစိုးရအဖွဲ့အစည်း အဝေးကို ယနေ့ ပြုလုပ်ခဲ့ရာ ပြည်ထောင်စုဝန်ကြီးချုပ်က အထက်ပါအတိုင်းထည့်သွင်း ပြာကြားသည်။
“ကာကွယ်ရေးဝန်ကြီးဌာနဘက်ကလည်း PDF စုဖွဲ့မှုတွေအကြောင်း ကြားသိနေရတာ အလွန်အားတက်စရာဖြစ်ပါတယ်။ အားလုံးရဲ့စုပေါင်းအင်အားတွေနဲ့ ရှေ့ခရီး ကို အတူတကွ ဆက်လျှောက် သွားကြမယ်ဆိုရင် အကြမ်းဖက်စစ်ကောင်စီ ရေရှည်တောင့်ခံနိုင်ဖို့ဆိုတာ မလွယ်တဲ့အခြေအနေဖြစ်ပါတယ်”ဟု ဝန်ကြီးချုပ် မန်းဝင်းခိုင်သန်းက ပြောသည်။
ထို့အပြင် အမျိုးသားညီညွတ်ရေးအတိုင်ပင်ခံကောင်စီ (NUCC) နှင့်ပတ်သက်ပြီး ဝန်ကြီးများနှင့် ဒုဝန်ကြီးများ နှစ်ရက်တိုင် ဆွေးနွေးခဲ့သည်ကို သိရကြောင်း ဝန်ကြီး ချုပ်က ဆိုသည်။
Public Service Announcement
“ဒီနွေဦးတော်လှန်ရေးကြီးမှာ တော်လှန်ရေးအင်အားစုတွေအားလုံး ပါဝင်ပေါင်းစပ်ထားတဲ့ NUCCနဲ့ ကျွန်တော်တို့ NUGက ပြည်သူတွေအတွက် အကျိုးများနိုင်မယ့်၊ တော်လှန်ရေးကို အားကောင်းစေနိုင်မယ့် ကိစ္စရပ်တွေကို အတူလက်တွဲပြီး မြန်မြန်ဆန်ဆန် ပေါင်းစပ်ညှိနှိုင်း လုပ်ဆောင် နိုင်ဖို့ဆိုတာ အင်မတန်အရေးကြီးပါတယ်”ဟု ဝန်ကြီးချုပ် မန်းဝင်းခိုင်သန်းက ပြောသည်
လက်ရှိတွင် ပူးပေါင်းဆောင်ရွက်ရေးကော်မတီ ၈ခုဖြင့် ပေါင်းစပ်လုပ်ဆောင်နေပြီးနောက်ပိုင်း ပိုမိုမြန်ဆန်ထိရောက်လာမည်ဟုယုံကြည်ကြောင်း ဝန်ကြီးချုပ်က ပြောကြားသည်။
“ဒါအပြင် တိုင်းရင်းသားမဟာမိတ်တွေ အားလုံးနီးပါးဟာ ဒီတော်လှန်ရေးမှာ အားလုံးအတွေးတူညီစွာနဲ့ ဦးတည်ချက် ခိုင်ခိုင်မာမာ ရှိနေတယ်ဆိုတာနဲ့ မြန်မာနိုင်ငံရဲ့ ဖြစ်တည်နေမှုကို နားလည်မှသာလိုအပ်တဲ့ ကူညီ ထောက်ပံ့မှုတွေ နည်းလမ်းမှန်စွာနဲ့ ရောက်ရှိနိုင်မှာလို့ ဆိုထားပါတယ်”ဟု ၎င်းက ဆိုသည်။
အစိုးရအတွက် ရံပုံငွေရှာရန် စိတ်ကူးကောင်းစွာဖြင့် စီမံဆောင်ရွက်နေသည့် စီမံဘဏ္ဍာဝန်ကြီးဌာနကိုလည်း အထူးကျေးဇူးတင်ကြောင်း ဝန်ကြီးချုပ်က ပြောကြားခဲ့သည်။
