စစ်ကောင်စီကိုအသိအမှတ်မပြုဘဲ NUG ကို ထိတွေ့ဆက်ဆံဖို့ မလေးရှားအစိုးရဘက်က ထုတ်ဖော်ပြောဆိုပြီးနောက် ဂျပန်အထူးသံတမန်ဆာဆာကာဝါဟာ မလေးရှားနိုင်ငံခြားရေးဝန်ကြီး ဆိုင်ဖူဒင်နဲ့ ဒီနေ့မှာ သွားရောက်တွေ့ဆုံလိုက်ပါတယ်။
မလေးရှားနိုင်ငံခြားရေးဝန်ကြီးရဲ့ လူမှုကွန်ရက်ကနေ ရေးသားချက်အရ မြန်မာ့အရေးအတွက် အရေးကြီးတဲ့အချက်အချို့ကို တွေ့ဆုံမှုမှာ မျှဝေခဲ့ကြတယ်လို့သိရပါတယ်။
အဲဒီအချက်တွေထဲမှာ အရပ်သားပြည်သူတွေ ရဲ့ လုံခြုံရေး အတွက် သက်ဆိုင်ရာအဖွဲ့အစည်းတွေရဲ့ပစ်ခတ်ရပ်စဲမှုအရေးကြီးကြောင်းနဲ့ တဆက်တည်းမှာပဲ အရေးတကြီး လူသားချင်းစာနာထောက်ထားမှုအကူအညီတွေပေးဖို့ နိုင်ငံတကာ ကို ဖိတ်ခေါ်ပြီး စီမံဖို့ အချက်တွေပါဝင်တယ်လို့သိရပါတယ်။
ဒါအပြင် အာဆီယံ ဘုံသဘောတူညီချက် ၅ ချက်ကိုအကောင်အထည်ဖော်ဖို့ ၊ မြန်မာနိုင်ငံအတွင်းက တွေ့ဆုံသင့်တဲ့သူတွေနဲ့ တွေ့ဆုံပြီး ငြိမ်းချမ်းရေးနဲ့ဒီမိုကရေစီ ပြန်လည်တည်ဆောက်ရေးတို့မှာ ဂျပန်အစိုးရအနေနဲ့ ကူညီဖို့အဆင့်သင့်ဖြစ်နေကြောင်း မစ္စတာဆာဆာကာဝါက မလေးရှားနိုင်ငံခြားရေးဝန်ကြီးကို အသိပေးခဲ့ပါတယ်။
မစ္စတာ ဆာဆာကာဝါဟာ နီပွန်ဖောင်ဒေးရှင်းဥက္ကဋ္ဌ ဖြစ်သလို မြန်မာနိုင်ငံ အမျိုးသား ပြန်လည်သင့်မြတ်ရေး ဆိုင်ရာ ဂျပန် အစိုးရ အထူးသံတမန် အဖြစ် ၂၀၁၃ ကနေစပြီး တာဝန်ပေးအပ်ခြင်းခံရသူလည်းဖြစ်ပါတယ်။
သူသည်အာဏာသိမ်းစစ်ကောင်စီခေါင်းဆောင်နဲ့ဆက်ဆံရေးကောင်းမွန်သူလည်းဖြစ်ပါတယ်။
ဒါပေမယ့် စစ်တပ်အာဏာသိမ်းပြီးနောက် ဝေဖန်မှုတွေကြားထဲက မြန်မာနိုင်ငံကို. လာရောက်ခဲ့တဲ့ ဆာဆာကာဝါရဲ့ခရီးစဉ်အတွင်းမှာ ဒေါ်အောင်ဆန်းစုကြည်နဲ့ တွေ့ဆုံခွင့်ကို စစ်ကောင်စီက ခွင့်မပြုခဲ့ပါဘူး ။
ဆာဆာကာဝါဟာ ပြီးခဲ့တဲ့ နှစ် နိုဝင်ဘာလအတွင်းကမြန်မာနိုင်ငံကိုလာရောက်ပြီး ရခိုင်ပြည်နယ်ကိုသွားရောက်ခဲ့ပါတယ်။ သူဟာ စစ်တပ်နဲ့ AA ကြားတိုက်ပွဲတွေမဖြစ်အောင် စေ့စပ်ပေးခဲ့သူလည်းဖြစ်ပါတယ်။