မုံးကိုးခရိုင်ထဲ နှစ်ရက်ဆက် တိုက်ပွဲပြင်းထန်နေ

မုံးကိုးခရိုင် တာမိုင်ပေါ်ဒေသမှာ ကိုးကန့်(MNDAA) ကချင်လွတ်မြောက်ရေးတပ်ဖွဲ့(KIA)ပူးပေါင်းတပ်နဲ့ စစ်​ကောင်စီတပ်တို့အကြား နှစ်ရက်ဆက်တိုက်ပွဲပြင်းထန်ခဲ့ပြီး စစ်ကောင်စီဘက်က ထိခိုက်ကျဆုံးမှုကိုတော့ အသေးစိတ်မသိရှိရသေးဘူးလို့ ကိုးကန့်က သတင်းထုတ်ပြန်ထားပါတယ်။

ကိုးကန့်နဲ့ ကေအိုင်အေပူးပေါင်းတပ်ဖွဲ့ရှိရာ အထူးဒေသ(၁) တာမိုင်ပေါ်ဒေသ မိုင်တောင်အနောက်ဘက်တောင်ကုန်းမှာ ပြီးခဲ့တဲ့ မေလ ၃၀ ရက်ညနေက စစ်ကောင်စီတပ်ဖွဲ့တွေဟာ စတင်ဝင်ရောက်လာခဲ့တာပါ။

ဒီလို စစ်ကောင်စီတပ်က ဝင်ရောက်လာတဲ့အပေါ် ကိုးကန့် ကေအိုင်အေပူးပေါင်တပ်ဖွဲ့တွေက သတင်းရရှိပြီး မေလ ၃၁ ရက်နေ ညနေ ၄ နာရီခန့်မှာ ဝင်ရောက်လာတဲ့ စစ်ကောင်စီတပ်ကို တားမြစ်တိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

တိုက်ပွဲဖြစ်စဉ်အတွင်း စစ်ကောင်စီဘက်က လက်နက်ကြီးမျိုးစုံပစ်ခတ်တိုက်ခိုက်ခဲ့ပြီး (၁၀၅)မိုင်က စစ်ကောင်စီရဲ့လက်နက်ကြီးစခန်းကလည်း တာဝေးပစ်လက်နက်ကြီးတွေနဲ့ ပစ်ကူပေးခဲ့ပြီး ညနေ ၄ နာရီ မိနစ် ၄၀ ခန့်မှာ ပူးပေါင်းတပ်ဖွဲ့တွေက တိုက်ပွဲနေရာကနေ ဦးစွာထွက်ခွာခဲ့ကာ နမ်မူတံတားဝန်းကျင်မှာ ယာယီအခြေချနေထိုင်တယ်လို့ ကိုးကန့်တပ်ဖွဲ့က ဆိုပါတယ်။

Public Service Announcement

ဇွန်လ ၁ ရက်နေ့ မနက် ၁၀ နာရီအချိန်မှတော့ စစ်ကောင်စီဟာ ပူးပေါင်းတပ်ဖွဲ့အခြေချတဲ့နေရာကို ဝင်ရောက်ထိုးစစ်ဆင်လာပြီး ပူးပေါင်းတပ်ဖွဲ့ဘက်က ခုခံတိုက်ခိုက်ခဲ့ကာ တိုက်ပွဲဟာ နာရီဝက်နီးပါးကြာ ကြာမြင့်ခဲ့ကာ စစ်ကောင်စီက (၁၀၅)မိုင်ကနေ လက်နက်ကြီးပစ်ကူပေးခဲ့တယ်လို့ ထုတ်ပြန်ချက်မှာပါရှိပါတယ်။

နှစ်ရက်တာအတွင်း တိုက်ပွဲတွေမှာ စစ်ကောင်စီဘက်က အကျအဆုံး အသေးစိတ်မသိရသေးပဲ ကိုးကန့်ကေအိုင်အေပူးပေါင်းတပ်ဖွဲ့ဘက်ကတော့ တစ်ဦးဒဏ်ရာရရှိသွားခဲ့တယ်လို့ ကိုးကန့်တပ်ဖွဲ့ရဲ့ ထုတ်ပြန်ထားချက်အရ သိရပါတယ်။