ဂန့်ဂေါတောင်ပိုင်း အောင်မြင်ရွာနှင့် အနောက်ဘက်ဂန့်ဂေါကြား တိုက်ပွဲဖြစ်

ဂန့်ဂေါတောင်ပိုင်း အောင်မြင်ရွာနှင့် အနောက်ဘက်ဂန့်ဂေါကြား တိုက်ပွဲဖြစ်ပွားရာ စစ်သားနှစ်ဦးလဲကျသွားသည်ကိုတွေ့ရပြီး ထိခိုက်သေဆုံးမှုမသိရသေးကြောင်း PDF GanGaw(တောင်ပိုင်း)အဖွဲ့က ယနေ့(ဇူလိုင် ၁) တွင် ထုတ်ပြန်သည်။

ယနေ့နံနက် ၇ နာရီခွဲက ဂန့်ဂေါမြို့ပေါ်မှ အင်အား ၆၀ ဝန်းကျင်ခန့်ရှိသော အကြမ်းဖက်စစ်ကောင်စီ စစ်ကြောင်းသည် WE LOVE တံတားအတိုင်း အနောက်ဘက်ဂန့်ဂေါသို့ စစ်ကြောင်းထိုးလာပြီး တောင်ဘက်သို့ဆက်လက်ထွက်လာရာ နံနက်၈နာရီ ၁၅ မိနစ်ခန့်တွင် အောင်မြင်ရွာနှင့် အနောက်ဘက်ဂန့်ဂေါကြားတွင် PDF-GANGAW (တောင်ပိုင်း)အဖွဲ့နှင့် KKG တပ်ရင်း(၆)အဖွဲ့တို့မှ ပူးပေါင်းဆီးကြိုတိုက်ခိုက်ခဲ့သည်ဟု ဖော်ပြသည်။

အဆိုပါထိတွေ့တိုက်ပွဲမှာ နာရီဝက်ခန့်ဖြစ်ပွားခဲ့ပြီး တော်လှန်ရေးရဲဘော်များဘက်မှ လက်နက်အင်အားမမျှသဖြင့် ပြန်လည်ဆုတ်ခွာပေးလိုက်ရကြောင်း အသိပေးသည်။ ယင်းစစ်ကြောင်းမှာ နံနက် ၉နာရီခွဲတွင် အောင်မြင်ရွာသို့ ဝင်ရောက်သွားပြီဟု ဆိုသည်။

လက်ရှိတွင် အကြမ်းဖက်စစ်ကောင်စီစစ်တပ်များသည် အောင်မြင်ရွာ ဘုန်းကြီးကျောင်းနှင့် ဂန့်ဂေါ – အိုက္ကားလမ်းပေါ်သို့ရောက်ရှိနေပြီး ၎င်းနေရာတစ်ဝိုက် ထိတွေ့တိုက်ပွဲအချိန်မရွေးဖြစ် လာနိုင်သောကြောင့် ပြည်သူများအနေဖြင့် ဂန့်ဂေါ – မင်းရွာလမ်းပိုင်းနှင့် ဂန့်ဂေါ – အိုက္ကားလမ်းပိုင်းတို့အား ဖြတ်သန်းသွားလာခြင်းမပြုကြရန် မေတ္တာ ရပ်ခံထားသည်။

Public Service Announcement