မင်းတပ်မြို့နယ်ရှိ ကျေးရွာအချို့အား စစ်ကောင်စီတပ်က လေကြောင်းတိုက်ခိုက်ခဲ့သည့် လုပ်ရပ်သည် စစ်ရာဇဝတ်မှုကျူးလွန်ခြင်းဖြစ်ပြီး ပြင်းထန်စွာကန့်ကွက်ရှုတ်ချကြောင်း ကြားကာလ ချင်းအမျိုးသား အတိုင်ပင်ခံကောင်စီ(ICNCC)က ယနေ့ ထုတ်ပြန်သည်။
မင်းတပ်မြို့ရှိ ချပ်ကျေးရွာနှင့် စွန်တောင်ကျေးရွာတို့အား စစ်ကောင်စီတပ်က ဇူလိုင် ၂ရက်တွင် စစ်လေယာဉ်ဖြင့် ဗုံးကြဲတိုက်ခိုက်ခဲ့ရာ ချင်းတိုင်းရင်းသား သုံးဦး သေဆုံးပြီး ပြည်သူအများအပြား ထိခိုက်ဒဏ်ရာရရှိခဲ့သည့်အပေါ် ICNCCက ယခုကဲ့သို့ ထုတ်ပြန်ခြင်းဖြစ်သည်။
ချင်းတိုင်းရင်းသားများနေထိုင်ရာ ကျေးရွာများကို စစ်လေယာဉ်ဖြင့် ကျူးကျော်ဝင်ရောက် ပစ်ခတ်တိုက်ခိုက်ခြင်းသည် စစ်ကောင်စီတပ်က ချင်းတိုင်းရင်းသားပြည်သူများအပေါ် ကျူးလွန်သော စစ်ရာဇဝတ်မှု ဖြစ်ကြောင်း ဖော်ပြသည်။
ချင်းပြည်နယ်အပါအဝင် တိုင်းရင်းသား ပြည်နယ်များနှင့် ပြည်မဒေသများရှိ ပြည်သူများအား စစ်လေယာဉ်များ အသုံးပြု၍ သာလွန်အင်အားအသုံးပြုပစ်ခတ်တိုက်ခိုက်ခြင်းဖြင့် မည်သည့် ကောင်းကျိုးမျှ ဖြစ်လာမည်မဟုတ်ဘဲ စစ်ကောင်စီအပေါ် တိုင်းရင်းသား လူထု၏နာကျည်းမှုကိုသာ ပိုမိုကြီးထွားလာစေမည်ဖြစ်သည်ဟု ကြားကာလချင်းအမျိုးသားအတိုင်ပင်ခံ ကောင်စီက ထုတ်ပြန်ခဲ့သည်။
Public Service Announcement
