အိန္ဒိယက ပြည်နယ်တစ်ခုမှာ မိုးကြိုးပစ်လို့ တစ်ပတ်အတွင်း လူ ၅၀ လောက်သေ

အိန္ဒိယက ပြည်နယ်တစ်ခုမှာ တစ်ပတ်မပြည့်ခင် အချိန်အတွင်း မိုးကြိုးပစ်လို့ လူ ၅၀ ဝန်းကျင် သေဆုံးခဲ့ကြောင်း သိရပါတယ်။

နိုင်ငံ မြောက်ပိုင်း၊ အူတာပရာဒက်ရှ် ပြည်နယ်ထဲက ကျေးရွာတစ်ခုမှာ ဇူလိုင် ၂၇ ရက်က မိုးကြိုးပစ်လို့ လယ်သမား အများစု အပါအဝင် လူ ၇ ဦး သေဆုံးသွားပါတယ်။ ဒီဖြစ်စဉ်ကြောင့် အခုသီတင်းပတ်အတွင်း ပြည်နယ်အနှံ့မှာ မိုးကြိုးပစ်လို့ လူသေတာ ၄၉ ဦး ရှိသွားပြီလို့ ရဲတပ်ဖွဲ့က ထုတ်ပြန်ခဲ့ပါတယ်။

မုတ်သုံမိုး သည်းသည်းထန်ထန် ရွာသွန်းနေမှုကြောင့် သစ်ပင်တွေအောက်မှာ လယ်သမားတွေ လူစုပြီး မိုးခိုနေတုန်း မိုးကြိုး ပစ်ချခဲ့တာပါ။ နေရာမှာ စုဝေးနေသူ ၇ ဦးစလုံး ပွဲချင်းပြီး သေဆုံးသွားကြောင်း ဒေသခံတွေက ပြောပါတယ်။ အဲဒီထဲမှာ မိသားစု တစ်ခုထဲက လူ ၄ ယောက်လည်း ပါဝင်ပါတယ်။

အသေအပျောက်စာရင်း မြင့်တက်လာတဲ့နောက် ပြည်နယ် အစိုးရဟာ မိုးကြိုးမုန်တိုင်းဒဏ်ကနေ ပြည်သူလူထု အနေနဲ့ ဘယ်လို အကာအကွယ် ယူရမလဲ ဆိုတာကို ညွှန်ကြားချက်တွေ ထုတ်ပြန်နေရပါတယ်။ မုတ်သုံမိုး ရွာသွန်းတဲ့ လက်ရှိ ကာလမျိုးမှာ နှစ်စဉ် ရေကြီးတာ၊ မိုးသည်းထန်မှုနဲ့ ဆက်စပ်တာတွေကြောင့် လူတွေ သေလေ့ ရှိပေမယ့် ဒီနှစ်မှာတော့ မိုးကြိုးပစ်လို့ သေဆုံးသူ အရေအတွက်ပါ သိသိသာသာ ထိုးတက်လာနေတယ်လို့ ပြည်နယ် အစိုးရ ပြောရေး ဆိုခွင့်ရ အရာရှိ ရှီရှာဆင်းက ပြောပါတယ်။

Public Service Announcement

အိန္ဒိယမှာ ဇွန်လကနေ စက်တင်ဘာလထိ မုတ်သုံမိုး ရွာသွန်းလေ့ ရှိပါတယ်။ အိန္ဒိယ မိုးလေဝသ ဌာနရဲ့ ထုတ်ပြန်ချက်အရ ဧပြီလစလို့ တစ်နိုင်ငံလုံး အတိုင်းအတာနဲ့ မိုးကြိုး ပစ်ခံရပြီး သေဆုံးသူ ၇၅၀ နီးပါးထိ များပြားလာပြီလို့လည်း သိရပါတယ်။