အမျိုးသမီး လစဉ်သုံး ကျန်းမာရေး ပစ္စည်းတွေ အလုံးစုံ အခမဲ့ မျှဝေပေးတဲ့ ပထမဆုံး နိုင်ငံအဖြစ် စကော့တလန်က မှတ်တမ်း ဝင်လာခဲ့ပါတယ်။
အခု သီတင်းပတ်ကစလို့ ဓမ္မတာကိစ္စ လစဉ်သုံး ပစ္စည်းတွေ လိုအပ်တဲ့ အမျိုးသမီးတွေဟာ နီးစပ်ရာ ဆေးဆိုင်တွေ၊ လူမှုကယ်ဆယ်ရေး စင်တာတွေမှာ အခမဲ့ တောင်းယူနိုင်တော့မယ်လို့ အစိုးရက ကြေညာပါတယ်။ ဒီအစီအမံကို ၂၀၂၀ ပြည့်နှစ်တုန်းက စကော့တလန် လွှတ်တော်မှာ အတည်ပြုခဲ့ပြီး အခုအခါ လက်တွေ့ စတင် အကောင်အထည် ဖော်လာတာပါ။
အရည်အသွေး ပြည့်မီတဲ့ လစဉ်သုံး ပစ္စည်းတွေကို အခမဲ့ ဖြန့်ဝေပေးခြင်းဟာ အမျိုးသမီးတွေရဲ့ ကျန်းမာရေး စောင့်ရှောက်မှု စနစ်ကို မြှင့်တင်ပေးပြီး ဂုဏ်သိက္ခာပိုင်းနဲ့ တန်းတူညီမျှ ရှိမှုတွေအတွက် အခြေခံ လိုအပ်ချက်တွေလို့လည်း ဆိုနိုင်ကြောင်း စကော့တလန် အစိုးရရဲ့ လူမှုတရားဆရေးဌာန ဝန်ကြီး ရှိနာရိုဘင်ဆင်က ထုတ်ပြန်ပါတယ်။
လူနေမှုစရိတ်တွေ ကြီးမြင့်လာတဲ့ မျက်မှောက်ခေတ်မျိုးမှာ အခုလို အခမဲ့ မျှဝေမှုမျိုးတွေဟာ ပိုလို့တောင် လိုအပ်လာဦးမယ်လို့လည်း သူက ပြောပါတယ်။ စကော့တလန် အမျိုးသမီး လွှတ်တော်အမတ် တစ်ဦးဖြစ်တဲ့ မော်နီကာ လင်နွန်ကလည်း ဒီလို အစီအမံမျိုးကို ကမ္ဘာပေါ်မှာ ပထမဆုံး အကောင်အထည် ဖော်နိုင်တဲ့ နိုင်ငံအဖြစ် စကော့တလန်က ရပ်တည်နိုင်ခဲ့တဲ့အပေါ် အရမ်းဂုဏ်ယူမိကြောင်း ပြောပါတယ်။ သူဟာ ဒီကိစ္စ အထမြောက်လာအောင်၂၀၁၆ မှာ စတင် အဆိုတင်သွင်း လှုံ့ဆော်ခဲ့သူ တစ်ဦးလည်း ဖြစ်ပါတယ်။
Public Service Announcement
နယူးဇီလန်နဲ့ ကင်ညာတို့လို နိုင်ငံတွေဟာ စာသင်ကျောင်းတွေမှာ အမျိုးသမီး လစဉ်သုံး ကျန်းမာရေး ပစ္စည်းတွေ အခမဲ့ ဝေငှပေးနေပေမယ့် တစ်နိုင်ငံလုံး အတိုင်းအတာနဲ့ စီမံဖြည့်ဆည်းပေးနိုင်တာကတော့ စကော့တလန်ဟာ ပထမဆုံးပါပဲ။ အမေရိကန်လို နိုင်ငံမျိုးမှာ အမျိုးသမီး လစဉ်သုံး ပစ္စည်းတွေ စုံစုံလင်လင် စုပြီး ထုပ်ပိုးပေးထားတဲ့ အထုပ်တစ်ထုပ်အတွက် ၇ ဒေါ်လာကနေ ၁၀ ဒေါ်လာကြား တန်ဖိုး ကျသင့်ပါတယ်။
အမေရိကန်လို နိုင်ငံမျိုးမှာတောင် ကောလိပ် ကျောင်းတက်နေတဲ့ အမျိုးသမီး စုစုပေါင်းရဲ့ ၁၄ ရာခိုင်နှုန်းလောက်ဟာ လစဉ်သုံး ပစ္စည်းတွေ ပုံမှန်ဝယ်ယူဖို့ ငွေရေးကြေးရေးအရ အကျပ်ရိုက်ရလေ့ ရှိတယ်လို့ ဆိုပါတယ်။ အဲဒီထဲမှာ အများစုက လူမည်းနဲ့ လက်တင် အနွယ်တွေ ဖြစ်တယ်လို့လည်း သိရပါတယ်။
