လက်နက်ကြီးပစ်ခတ်မှုကြောင့် မုန်းမြို့နယ်ထဲက ကျေးရွာ ၆ ရွာလောက် ထွက်ပြေးတိမ်းရှောင်နေရ

မုန်းမြို့နယ်အတွင်းရှိ ကျေးရွာတွေထဲကို စစ်ကောင်စီတပ်က လက်နက်ကြီးနဲ့ပစ်ခတ်ခဲ့တာကြောင့် ကျေးရွာပေါင်း(၆)ရွာက ဒေသခံပြည်သူတွေ ထွက်ပြေးတိမ်းရှောင်နေကြရတယ်လို့ ကေအဲန်ယူက သတင်းထုတ်ပြန်ထားပါတယ်။

စက်တင်ဘာလေးရက်နေ့ ညနေငါးနာရီအချိန်ခန့်က စစ်ကောင်စီရဲ့ ခလရ(၃၉)တပ်က လက်နက်ကြီးသုံးချက်ပစ်ခတ်ခဲ့ပြီး အဆိုပါပစ်ခတ်မှုဟာ ကေအဲန်ယူ-ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ မူးမြို့နယ်ထဲရှိ ရွှေပြည်သာကျေးရွာအတွင်းကို ကျရောက်ခဲ့ကာ ထိခိုက်ပျက်စီးမှုတွေ မရှိဘူးလို့ ကေအဲန်ယူက ဆိုပါတယ်။

ဒီလို စစ်ကောင်စီရဲ့လက်နက်ကြီးပစ်ခတ်မှုကြောင့် ရွေပြည်သာကျေးရွာနဲ့ အခြားကျေးရွာစုစုပေါင်း(၅)ရွာခန့်က ဒေသခံပြည်သူတွေ ကြောက်လန့်ပြီး ထွက်ပြေးတိမ်းရှောင်နေကြရတာဖြစ်တယ်လို့ ကေအဲန်ယူရဲ့ထုတ်ပြန်ချက်အရ သိရပါတယ်။

ကော်သူးလေအုပ်ချုပ်နယ်မြေ ခလယ်လွီထူ(ညောင်လေးပင်)ခရိုင် တပ်မဟာ(၃)ထဲမှာ စစ်ကောင်စီတပ်ရဲ့ စစ်ဆင်ရေးဆောင်ရွက်မှုကြောင့် ထိတွေ့တိုက်ပွဲတွေဖြစ်ပွားခဲ့ပြီး ဒေသခံပြည်သူ(၆၁၀၀၀)ကျော်ဟာ ဘေးလွတ်ရာထွက်ပြေးတိမ်းရှောင်နေခဲ့ရကာ လူသားချင်းစာနာမှုအကူအညီတွေ လိုအပ်လျက်ရှိနေတယ်လို့ ကေအဲန်ယူက သတင်းထုတ်ပြန်ထားတာဖြစ်ပါတယ်။

Public Service Announcement