အကြမ်းဖက်စစ်ကောင်စီ၏ လက်နက်ကြီးများဖြင့် ရမ်းသမ်းပစ်ခတ်မှုကြောင့် မိုးဗြဲမြို့တွင် ဒေသခံစစ်ဘေးရှောင်ပြည်သူ ကလေးငယ်များအပါအဝင် အနည်းဆုံးလေးဦး သေဆုံးကြောင်း တိုးတက်သောကရင်နီပြည်သူ့ အင်အားစု (PKPF)က ထုတ်ပြန်သည်။
ယနေ့(စက်တင်ဘာ ၁၆ ရက်) နံနက်ပိုင်းက မိုးဗြဲ မြို့မွေတော်ဘုရားဝင်းအတွင်းစစ်ဘေးရှောင် ပြည်သူများနေရာသို့ လက်နက်ကြီးကျရောက် ပေါက်ကွဲ ခဲ့ခြင်းဟု ဆိုသည်။
“မနက် ၆ နာရီမတိုင်ခင်ကတည်းက လက်နက် ကြီးတွေ တအုန်းအုန်းပဲ။လုံခြုံမယ်ထင်တဲ့ နေရာကို မှ ပစ်ခံရတာ။ဒဏ်ရာရတဲ့သူလည်းအများကြီးပဲ”ဟု မိုးဗြဲ မြို့ဒေသခံတစ်ဦးက လူထုနွေဦး သို့ပြောသည်။
လက်ရှိတွင် စစ်ဘေးရှောင်ထိခိုက်မှုအသေးစိတ် အခြေအနေကို မသိရသေးဘဲ Mobye Resue Team အနေဖြင့်လည်း တရားဝင်သတင်းမထုတ်ပြန်သေးပေ။
Public Service Announcement
သေဆုံးမှုများ၍ တပ်ဆုတ်သွားရသည့် အကြမ်း ဖက် စစ်ကောင်စီတပ်က ယမန်နေ့ကစ၍ တကျော့ပြန်ထိုးစစ်ဆင်လာကြောင်း မိုးဗြဲပြည်သူ့ကာကွယ်ရေးတပ်(MBPDF)က ထုတ်ပြန်ထားသည်။
စစ်ကောင်စီစစ်ကြောင်းသည် ဝှါရီဆူးပလိုင်ရွာနှင့် မိုးဗြဲမြို့ကြား ရထားလမ်းတွင် ရောက်ရှိနေပြီး မိုးဗြဲမြို့အတွင်းသို့ လက်နက်ကြီးဖြင့် ရမ်းသမ်းပစ်ခတ်နေသည်ဟု ဆိုသည်။
ထို့ကြောင့် ဒေသခံပြည်သူများအနေဖြင့် လုံခြုံစိတ်ချရသောနေရာတွင် နေပေးရန်နှင့် ပြည်သူများအနေဖြင့် မိုးဗြဲလမ်းကို အသုံးမပြုသေးရန် MB PDFက တိုက်တွန်းထားသည်။
