ဖားအံမြို့နယ် ညောင်တုန်းကျေးရွာအတွင်း ဝင်ရောက်တပ်စွဲထားသည့် နယ်ခြားစောင့်တပ်(BGF)က ကျေးရွာထဲ လက်နက်ကြီးနှင့် ပစ်ခတ်မှုကြောင့် ကလေးငယ်တစ်ဦးအပါအဝင် အရပ်သားသုံးဦး ထိခိုက်ဒဏ်ရာရရှိခဲ့သည်ဟု ကေအဲန်ယူမှ သတင်းထုတ်ပြန်သည်။
ညောင်တုန်းကျေးရွာအတွင်း ဝင်ရောက်တပ်စွဲထားသော စစ်ကောင်စီလက်အောက်ခံ နယ်ခြားစောင့်တပ်စစ်ဆေးရေးဂိတ်မှ စက်တင်ဘာလ(၂၄)ရက် ညနေငါးနာရီခွဲအချိန်က ကျေးရွာအတွင်းသို့ လက်နက်ကြီးဖြင့်ပစ်ခတ်ခဲ့ရာ ညောင်တုန်းကျေးရွာမှ အသက်(၈)နှစ်အရွယ် ကလေးငယ်တစ်ဦးနှင့် အမျိုးသမီးနှစ်ဦး စုစုပေါင်းသုံးဦးမှာ လက်နက်ကြီးစထိမှန်ဒဏ်ရာရခဲ့သည်ဟု ထုတ်ပြန်ထားသည်။
“အရပ်သား(၃)ဦး ထိခိုက်ဒဏ်ရာရသည့်အပြင် နွားတစ်ကောင် ဆိတ်တစ်ကောင်လည်း လက်နက်ကြီးစထမှန်ခဲ့သေးသည်” ဟု ကေအဲန်ယူ၏ ထုတ်ပြန်ချက်တွင်ဖော်ပြထားသည်။
ညောင်တုန်း BGF စစ်ဆေးရေဂိတ်သည် BGF-၁၀၁၄ တပ်ရင်း၊ တပ်ခွဲ(၂)လက်အောက်ခံဖြစ်ပြီး တပ်ခွဲမှူးမှာ ဗိုလ်တင်ဝင်းဟုသိရကာ ယခုလိုလက်နက်ကြီးပစ်ခတ်မှုကြောင့် ဒဏ်ရာရရှိသွားခဲ့သည့်အရပ်သားများအတွက် BGF မှ ဆေးဖိုး (၂၀၀၀၀၀)ကျပ် ပေးခဲ့ကြောင်း ထုတ်ပြန်ချက်တွင်ပါရှိသည်။
Public Service Announcement
ညောင်တုန်းဂိတ်ရှိ BGF တပ်ဖွဲ့ဝင်များသည် ဒေသခံပြည်သူများအား ခေါ်ယူခြိမ်းခြောက်ခြင်း၊ လက်နက်ကြီး လက်နက်ငယ်များဖြင့် ရမ်းသမ်းပစ်ခတ်ခြင်းများစသည့် လူ့အခွင့်အရေးချိုးဖောက်မှုများအား မကြာခဏလုပ်ဆောင်လေ့ရှိသည်ဟု ကေအဲန်ယူ၏ထုတ်ပြန်ချက်အရ သိရပါသည်။
